საქართველოს ეროვნული ნაკრების ყოფილმა ბურჯმა დავით ზირაქაშვილმა, საფრანგეთის ტოპ 14-ის ლიდერ „კლერმონთან“ ახალი, 3-წლიანი კონტრაქტი გააფორმა და იქ 2020 წლამდე დარჩება.

33 წლის მორაგბის სიმაღლე 179 სანტიმეტრია და 118 კილოგრამს იწონის. ის იმ მორაგბეთა რიცხვს ეკუთვნის, რომელიც კლუბის ერთგულებით გამოირჩევა და „კლერმონი“ ერთადერთი ფრანგული კლუბია, სადაც უთამაშია. როგორც ჩანს, დათო სარაგბო კარიერას სწორედ „ვულკანებში“ დაასრულებს.

ზირაქაშვილი „კლერმონში“ 2004 წელს გადავიდა, პრაქტიკულად პირველივე დღიდან იქცა გუნდის შერკინების ლიდერად და პლანეტის ერთ-ერთი საუკეთესო მარჯვენა ბურჯია. განვლილ 13 სეზონში მან ამ გუნდის მაისურით 262 მატჩი ჩაატარა და 18 ლელო დადო. ეს მაჩვენებელი კიდევ უფრო შთამბეჭდავი იქნებოდა, რომ არა რამდენიმე ტრავმა. მან რამდენჯერმე ითამაშა საფრანგეთის ჩემპიონატის ფინალში, თუმცა გამარჯვებული მხოლოდ ერთხელ, 2010 წელს გახდა. გარდა ამისა, მან და „კლერმონმა“ 2007 წელს ევროპის რანგით მეორე, ევროპის ჩელენჯ ქაფი მოიგეს.

მის ანგარიშზე 53 სანაკრებო კეპია და 9 ლელო დადო. „ბორჯღალოსნებში“ დათოს დებიუტი 2004 წელს, ურუგვაისთან მონტევიდეოში გამართულ მატჩში შედგა. ზირაქაშვილი ეროვნულ გუნდს შარშან, 2015 წლის მსოფლიო თასზე ნამიბიასთან გამართული მატჩის შემდეგ დაემშვიდობა. მას ნათამაშები აქვს 3 მსოფლიო თასზე - 2007, 2011 და 2015 წლებში. გარდა ამისა, ზირაქაშვილი იყო პირველი ქართველი მორაგბე, რომელიც მსოფლიო ნაკრებში გამოიძახეს (მსოფლიო ნაკრები და „ბარბაროსები“ სხვადასხვა გუნდებია) და ახალი ზელანდიის ვეტერანთან გუნდის წინააღმდეგ ითამაშა. ცნობისათვის, მის გარდა ქართველი მორაგბეებიდან მსოფლიო ნაკრებში მხოლოდ მამუკა გორგოძეს უთამაშია.

ზურა ქსოვრელი