ახალი ზელანდიის ნაკრების მთავარმა მწვრთნელმა სტივ ჰანსენმა გუნდის ოთხ ერზე გამოსვლა შეაფასა, რომელიც „ოლ ბლექსმა“ ქულათა მაქსიმუმით დაასრულა.

„მოხარული ვარ, რომ უწინდელი მიღწევა - ზედიზედ 17 მოგება გავიმეორეთ და ისტორიაში შევედით. თუმცა მთავარი ისაა, რომ გვსურს უკეთესები ვიყოთ და ისეთ შედეგს მივაღწიოთ, რისი მსგავსისთვის აქამდე არავის მიუღწევია. მსოფლიო თასისა და რაგბი ჩემპიონშიპის მოგება კარგი მომზადების შედეგია. არ ვამბობ, რომ სამხრეთ აფრიკა, ავსტრალია და არგენტინა ცუდად მოემზადნენ, უბრალოდ ჩვენ ამ პროცესში უზარმაზარი ძალისხმევა ჩავდეთ. გაუმჯობესებაზე დიდი ხნის განმავლობაში ვმუშაობდით და ბრწყინვალე შედეგი მივიღეთ.

ყველა ჩვენი მეტოქე ძლიერი გუნდია, უბრალოდ, მათზე უკეთ ვითამაშეთ და საჭირო წნეხში მოვაქციეთ. შორეულ მომავალზე საუბარი არ მიყვარს და მომდევნო ნაბიჯიც ორ კვირაში ავსტრალიასთან გასამართი მატჩია. ახლა მხოლოდ მასზე ვართ კონცენტრირებული. უნდა დავრწმუნდეთ, რომ გუნდი ოკლენდის შეხვედრას მაქსიმალურად მომზადებული შეხვდება“ - თქვა ჰანსენმა.

ახალი ზელანდიის ნაკრები ავსტრალიას „იდენ პარკზე“ 22 ოქტომბერს ეთამაშება.

ზურა ქსოვრელი