ჭაბუკთა „ა“ ლიგის მეორე ეტაპზე 9 ტური მიილია და გუნდებიც პრაქტიკულად საბოლოოდ გაიყვნენ ზედა და ქვედა ოთხეულებად.

ისე მოხდა, რომ გასულ ტურში მოწინავეები ქვევით მყოფებს ეთამაშებოდნენ და ყველამ პრემიით მოიგო.

ქუთაისში დერბი შედგა, მაგრამ ბრძოლა არ გამოვიდა. „აია 1“-მა თანაქალაქელი „ბაგრატიც“ არ დაინდო და 94:10 დაამარცხა. „აიასთვის“ ეს მეორე ეტაპზე ზედიზედ მე-9 გამარჯვებაა და აქედან 8 შემთხვევაში პრემიალური ქულაც აიღო.

„აია 1“-ის გარდა ყველა სხვა გუნდის დამარცხებას განაგრძობს თბილისის „ლელო“, რომელმაც „არმიას“ ქულაც არ ააღებინა ისე მოუგო - 36:0. ლელოელები ლიდერს 6 ქულით ჩამორჩებიან და მართალია მათთან თამაში აქვთ ჩასატარებელი, მაგრამ ქუთაისში და ესეც რომ არა, მხოლოდ ერთი შეხვედრით 6-ქულიანი ჩამორჩენის აღმოფხვრა შეუძლებელია.

სამაგიეროდ, მდევართან შესანარჩუნებელი აქვს 5-ქულიანი უპირატესობა. ეს მდევარი თბილისის „ლოკომოტივია“, რომელმაც „იუნკერები ჩოხოსნებს“ 46:19 აჯობა.

ტურში ყველაზე საინტერესო თამაში რუსთავში გაიმართა, სადაც „ხარები“ გორის „ჯიქს“ მასპინძლობდა. გორელებს შეეძლოთ ოთხეულთან მიახლოვება, მაგრამ რუსთაველმა ჭაბუკებმა ამის საშუალება არ მისცეს. უფრო მეტიც, მეტოქეს 34:7 მოუგეს და პრემიაც რომ აიღეს, მდევართან უპირატესობა 12 ქულამდე გაზარდეს. თეორიულად, ამ ჩამორჩენის 5 ტურში აღმოფხვრა შესაძლებელია, მით უმეტეს უახლოესი კალენდარის გათვალისწინებით, თუმცა პრაქტიკულად, ეს უფრო ფანტასტიკის სფეროს განეკუთვნება.

ზურა ქსოვრელი