საქართველოს მორაგბეთა ეროვნული ნაკრების შუამარბმა თამაზ მჭედლიძემ, პრო დ2-ის მეოთხე ტურში „ბიარიცს“ ლელო საფინალო სასტვენამდე 3 წუთით ადრე დაუდო და ზუსტი გარდასახვის შემდეგ, მისმა გუნდმა 23:22 იმარჯვა.

23 წლის მორაგბემ შუამარბის პოზიციაზე სრულად ითამაშა, ლელო კი, ურთულეს სიტუაციაში, პირველხაზელის სტილში შეიტანა. „აჟენი“ 16:22 აგებდა და მოედანზე 12 კაცის ამარა იყო დარჩენილი. მასპინძლებმა 30-ე და 71-ე წუთებზე წითელი ბარათებით ორი მორაგბე დაკარგეს, ხოლო 69-ე წუთზე ბურჯმა ვახტანგ ახობაძემ, რომელიც შეცვლაზე 58-ე წუთზე შევიდა, ყვითელი მიიღო. 71-ე წუთზე წითლით მეტოქეც დაისაჯა და ის მოედანზე 14 კაცით დარჩა.

77-ე წუთზე ლელოდან 5-მეტრში აგორებულ მოლში უკანახაზელებიც ჩაერთვნენ, მჭედლიძემ მანძილი ბურთით ხელში დაფარა და ლელოში დაამიწა, ხოლო თანაგუნდელმა გარჯა დაუფასა და გარდასახვა ზუსტად შეასრულა.

ზურა ქსოვრელი