ინგლისის ეროვნული ნაკრებისა და „არლეკინსის“ ბურჯმა ჯო მარლერმა იმ მიზეზებზე ისაუბრა, რის გამოც ივნისში ავსტრალიური ტურნე გამოტოვა.

„ერთ-ერთი ვარჯიშიდან ვბრუნდებოდი, როდესაც საკუთარი თავი გამოვიჭირე ფიქრში, რომ იქ ყოფნა არ მინდოდა. ამის შესახებ ედი ჯონსს ვუთხარი და მას ნორმალური რეაქცია ჰქონდა, წარმატებები მისურვა. თავადაც არ ვისურვებდი მოედანზე ისეთ მოთამაშესთან ერთად გასვლას, რომელიც მხოლოდ ხელფასზე ფიქრობს. ვფიქრობდი, რა რეაქცია მექნებოდა ჯერ კიდევ ბავშვობისას რომ დამენახა ჩემი გმირი, რომელიც თავგანწირვის, თვალებში ცეცხლის გარეშე, უბრალოდ ასრულებდა თავის მოვალეობას და გადაწყვეტილებაც იმავე წამს მივიღე“ - ამბობს 26 წლის მორაგბე, რომელიც გამორჩეულია უდისციპლინობით, თუმცა, ჯოს დასვენებისას ამაზეც ბევრი უფიქრია:

„მთელი შვებულება ვფიქრობდი, თუ რა მემართებოდა. ვცდილობდი ყველაფრის შეფასებას, დასკვნების გამოტანას. ახლა თავს კარგად ვგრძნობ და დარწმუნებული ვარ, ვინმემ პირველსავე ტურში სახეში ხელი რომც გამარტყას, თავის შეკავებას და მრისხანებასთან გამკლავებას შევძლებ“.

მარლერმა 2009 წლიდან დღემდე „არლეკინსის“ მაისურით 131 თამაში ჩაატარა და 6 ლელო დადო. 2012 წლიდან დღემდე მის ანგარიშზე 42 სანაკრებო კეპია.

ზურა ქსოვრელი