ბექა გორგაძის „მონ დე მარსანმა“ საფრანგეთის მეორე ელიტარული დივიზიონის, პრო დ2-ის სასტარტო ტურში, საფინალო სასტვენამდე 5 წუთით ადრე ჯარიმა გაუშვა და 16:19 მარცხისთვის მხოლოდ ერთი პრემიალური ქულით დაკმაყოფილდა.

სტუმრები მე-7 წუთზე ჯარიმით დაწინაურდნენ, პასუხად „პერპინიენმა ორი ჯარიმა გაიტანა, თუმცა ტაიმის მიწურულს, კაცნაკლულმა „მონ დე მარსანმა“ ლელო დადო და შესვენებაზე 4-ქულიანი უპირატესობით გავიდა - 10:6. მასპინძლებმა ლელო-გარდასახვა 54-ე წუთზე გაქვითეს, მეთ ჯეიმსმა ჯარიმით წონასწორობა 4 წუთში აღადგინა, თუმცა თამაშის განახლებისთანავე „პერპინიენი“ კვლავ წინ გავიდა. 63-ე წუთზე „მონ დე მარსანი“ მეორედ დარჩა მოედანზე კაცნაკლული, სამიოდე წუთში შეცვლაზე 20 წლის ქართველი შევიდა და 69-ეზე ჯეიმსმა გამათანაბრებელი ჯარიმა კვლავ გაიტანა, თუმცა მისმა გუნდმა ფრე ვერ შეინარჩუნა.

პრო დ2-ის ექვსი თამაში დღეს საღამოს გაიმართება და მათში ქართველების მონაწილეობის შესახებ ინფორმაციას მოგვიანებით მოგაწვდით, ხოლო პირველი ტურის დასკვნითი მატჩი კვირასაა დანიშნული.

ზურა ქსოვრელი