ფრანგული „ტულონი“ ამერიკის შეერთებულ შტატებში ახალი კლუბის თანადამაარსებელი გახდა. ამიერიდან რაგბის კლუბი „მაიამი“ ფრანგული გრანდისგან პირდაპირ დახმარებას მიიღებს.

კლუბის პრეზიდენტმა მურად ბუდჯელალმა იდეის მიზნებზე და დახმარების ფორმებზე ისაუბრა:

„მიზანი ისაა, რომ ამერიკის შეერთებულ შტატებში სრულფასოვანი ჩემპიონატი ჩატარდეს. ძალიან დიდი იმედი მაქვს, რომ ჩვენს მაგალითს ტოპ 14-ის დანარჩენი კლუბებიც მიბაძავენ. ვფიქრობთ, რომ „მაიამიში“ გავანათხოვრებთ დაახლოებით ათამდე ჩვენ მორაგბეს, რომელთაც სათამაშო პრაქტიკა ჭირდებათ“.

შეგახსენებთ, რომ ერთი წლის წინ აშშ-ში პროფესიული სარაგბო ლიგა შეიქმნა. „ტულონის“ პირველ გუნდში მამუკა გორგოძე, ლევან ჩილაჩავა და ბადრი ალხაზაშვილი ირიცხებიან. ჯერჯერობით უცნობია, თუ რომელ მორაგბეებს მოუწევთ ოკეანის გაღმა გამგზავრება.

ზურა ქსოვრელი