ირლანდიელების, უელსელების, შოტლანდიელების და იტალიელების გაერთიანებული ლიგის, პრო 12-ის ხელმძღვანელობა აქტიურ მოლაპარაკებას აწარმოებს ამერიკელებთან და არაა გამორიცხული, უახლოეს მომავალში ყოფილი „კელტების ლიგის“ გათამაშებაში ამერიკული ფრანშიზი ჩაერთოს.

რა თქმა უნდა, ამის უმთავრესი მიზეზი კომერციული დაინტერესებაა, თუმცა კალენდარი და უფრო კონკრეტულად სანაკრებო ექვსი ერი, გარკვეულ პრობლემებს ქმნის.

„ამერიკის შეერთებული შტატების რაგბის კავშირთან მოლაპარაკება გვქონდა ამერიკული ფრანშიზის შექმნის და მისი პრო 12-ში ჩართვის შესახებ. განვიხილეთ ტელეტრანსლიაციების და სპონსორობის საკითხები. ერთადერთი გზა, ვაქციოთ მეორე ეშელონის ქვეყანა პირველად, ესაა პროფესიონალური საკლუბო რაგბის განვითარება.

რა თქმა უნდა, კომერციული თვალსაზრისით ჩვენი ურთიერთობა ძალიან მიმზიდველია. მაგრამ მთავარი პრობლემა ექვსი ერია. აუცილებელია მისი ჩატარების ვადების შეცვლა, რადგან ამერიკაში სარაგბო სეზონს ვერ შევცვლით. იდეალურ ვარიანტში, ექვსი ერი ევროპის საკლუბო ჩემპიონატების დასრულების შემდეგ უნდა ტარდებოდეს. ამ შემთხვევაში კლუბები ნაკრებში მოთამაშე მორაგბეებს არ დაკარგავენ“ - ამბობს პრო 12-ის თავკაცი მარტინ ანაი.

გლობალური კალენდრის შექმნაზე და მსხვილი სანაკრებო ტურნირების თუ ტესტ-მატჩების ჩატარების თარიღის შეცვლაზე ბოლო ერთი წელიწადია აქტიურად საუბრობენ, თუმცა ეს 2020 წლამდე ვერ მოხდება.

ზურა ქსოვრელი