საფრანგეთის ეროვნული ნაკრების შერკინების შემკვრელი ლუი პიკამოლი, რომელიც ცოტა ხნის წინ „ავივა პრემიერშიპის“ „ნორთჰემპტონში“ გადავიდა იმ მიზეზებზე საუბრობს, რის გამოც არჩევანი ინგლისზე შეაჩერა.

„საფრანგეთის ჩემპიონატში უპირატესობა კონტაქტურ რაგბის ენიჭება, ინგლისში კი, გუნდები უმეტესად დინამიურ თამაშს ირჩევენ. ეს ჩემს სამომავლო პროგრესს მიესადაგება. სულ უფრო მეტია ისეთი ფრანგი, რომელიც ტოპ 14-ში ლეგიონერების ზრდის ფონზე კარიერის უცხოეთში გაგრძელებაზე ფიქრობს“ - ამბობს პიკამოლი.

30 წლის მორაგბემ პროფესიონალური კარიერა „მონპელიეში“ დაიწყო და იქ 2004-2009 წლებში თამაშობდა, საიდანაც „ტულუზში“ გადავიდა და 7 წლის განმავლობაში 22 ლელო გაიტანა. პიკამოლი საფრანგეთის ნაკრებში 2008 წლიდან თამაშობს და დღემდე 54 კეპი მოიხვეჭა. მის ანგარიშზე 6 სანაკრებო ლელოა.

ზურა ქსოვრელი