როგორც ჩანს, ბრიტანეთში საბოლოოდ იწამეს ქართველი მორაგბეების შესაძლებლობების და მომავალ სეზონში ინგლისის „ავივა პრემიერშიპში“ ერთბაშად სამი „ბორჯღალოსანი“ ითამაშებს.

ამდენი მორაგბე ინგლისის ჩემპიონატში აქამდე არასდროს გვყოლია. შეგახსენებთ, რომ შარშან „ვუსტერის“ ღირსებას იცავდა და მომავალ სეზონშიც იქ ითამაშებს კვაჭი ჯაბა ბრეგვაძე, დაახლოებით ერთი თვის წინ კი, პრემიერშიპში აღზევებულ „ბრისტოლში“ გადავიდა მეორეხაზელი გიორგი ნემსაძე.

ცოტა ხნის წინ პრემიერშიპის „ნორთჰემპტონში“ სინჯებზე გაემგზავრა საქართველოს ნაკრების მეორეხაზელი ნოდარ ჭეიშვილი და ამხანაგურ მატჩშიც მიიღო მონაწილეობა. ოფიციალურად, ტრანსფერის შესახებ ინფორმაცია არ გავრცელებულა, თუმცა უკვე გამოქვეყნდა 25 წლის ქართველის ფოტოები „ნორთჰემპტონის“ ფორმაში. ისაა კლუბის მიერ წინასასეზონოდ გადაღებულ ოფიციალურ ფოტოზეც (შუა რიგში, მარჯვნიდან მეხუთე). ცნობილია, რომ კლუბში აქტიურად მუშაობდნენ მეორე ხაზის გაძლიერებაზე და როგორც ჩანს, მათ ამ პრობლემას სწორედ ჭეიშვილი მოაგვარებს.

კონტრაქტის ხანგრძლივობაზე ინფორმაციას მოგვიანებით მოგაწვდით, მანამდე კი გეტყვით, რომ ნოდარისთვის ეს პირველი უცხოური კლუბი არაა. ის უკვე თამაშობდა საფრანგეთში, ფედერალ 1-ის „ლა სენში“, შარშან სამშობლოში დაბრუნდა და „ლელო-სარასენსთან“ ერთად საქართველოს ჩემპიონი გახდა. მის ანგარიშზე 4 სანაკრებო კეპია. „ნორთჰემპტონმა“ პრემიერშიპის გასული სეზონი მეხუთე ადგილზე დაასრულა და ჩემპიონთა თასზეც ითამაშებს.

რაც შეეხება 23 წლის გაგი ბაზაძეს. მისი პირველი ფრანგული კლუბი „მონპელიე“ იყო და 2012-2014 წლებში ოსტატობას ამ გუნდის ესპუარებში ხვეწდა, რის შემდეგაც ცოტა ხნით „მასიში“ გადავიდა, გასული სეზონი კი, ტოპ 14-ის „ლა როშელში“ გაატარა და 12 მატჩში ერთი ლელო გაიტანა.

„ლა როშელმა“ გაგისთან კონტრაქტის გაგრძელება არ ისურვა და ახლახანს ის „სამედიცინო ჯოკერის“ სტატუსით კვლავ „მონპელიემ“ აიყვანა. 188 სანტიმეტრისა და 128 კილოგრამის წონის მორაგბემ, თავის ყოფილ კლუბთან ამჯერად სამთვიანი კონტრაქტი გააფორმა. ახლა ყველაფერი მასზე და ანტუან გიემონის ჯანმრთელობის მდგომარეობაზე იქნება დამოკიდებული, რომლის ნაცვლადაც ბაზაძე დაიმატეს. შეგახსენებთ, რომ „მონპელიეში“ ბურჯები მიხეილ ნარიაშვილი და დუდუ ქუბრიაშვილი, ასევე მეორეხაზელი კოტე მიქაუტაძე თამაშობენ.

ზურა ქსოვრელი