პოპულარულმა სარაგბო გამოცემა PlanetRugby-მ მკითხველთა მოსაზრებები გაანალიზა და მათგან სამი უმთავრესი მიმართულება შეარჩია.

რა გასაკვირია, რომ წერილების უმეტესობა ექვსი ერის ფორმატის შეცვლას, მის შვიდ ერად გადაკეთებას ეხებოდა და ვებ-გვერდზე მაილს ალექსანდერის მოსაზრება მოხვდა სათაურით - შვიდი ჯობია ექვსს:

„ვფიქრობ ლოგიკური იქნება, თუ ექვს ერს ერთი გუნდი დაემატება და ის შვიდ ერად გადაკეთდება, რაც ერთ, ან ორ წელიწადში ერთხელ, ასვლა-ჩასვლის სისტემის დანერგვის საშუალებასაც გააჩენს.

საქართველომ დიდი ხანია დაამტკიცა, რომ შეუძლია უსიამოვნებები შეუქმნას ევროპულ ელიტას და მოცემულ მომენტში „მსოფლიო რაგბის“ რეიტინგში იტალიაზე მაღლა იკავებს ადგილს. ტოპ-გუნდებისთვის პრობლემების შექმნა შეუძლიათ რუმინელებსაც, რომლებსაც ისტორიულად უკვე დამარცხებული ჰყავთ რამდენიმე ევროპული გრანდი.

შვიდი გუნდის ჩართვა ტურნირს გახდის უფრო სანახაობრივს და ამავდროულად, დანარჩენ ევროპულ ქვეყნებს გაუჩნდებათ უდიდესი სტიმული. მათ მიეცემათ შანსი ერთ დღეს ითამაშონ ისეთ ცნობილ სტადიონებზე, როგორებიცაა „მარიფილდი“ და „თვიქენჰემი“. რაგბის ადმინისტრატორები მუდამ თამაშის ზრდაზე საუბრობენ და ამ გზით ამის შესანიშნავი შანსი გაჩნდება“.

მოამზადა ზურა ქსოვრელმა