პრემიერ-მინისტრ გიორგი კვირიკაშვილის განცხადებით, ქვეყნისთვის უპრეცედენტო მასშტაბის სპორტული ინფრასტრუქტურა აშენდება.

პრემიერის თქმით, აღნიშნული ინფრასტრუქტურის მოწყობა 65 მილიონ დოლარზე მეტი დაჯდება.

„ჩვენი ქვეყნისთვის უპრეცედენტო მასშტაბის ინფრასტრუქტურის მშენებლობა იწყება. 65 მილიონ დოლარზე მეტი სლოვაკური და კანადური ინვესტიცია განხორციელდა ამ მიმართულებით“, - აღნიშნა პრემიერმა.

სპორტისა და ახალგაზრდობის საქმეთა მინისტრის ტარიელ ხეჩიკაშვილის განცხადებით, აღნიშნული ინფრასტრუქტურის მოწყობა საქართველოში რაგბის 20-წლამდელთა მსოფლიო ჩემპიონატსა და ხელბურთში ევროპის ჩემპიონატს უკავშირდება.

„2017 წელს ჩვენ უნდა ვუმასპინძლოთ რაგბიში 20-წლამდელთა მსოფლიო ჩემპიონატს და ასევე, ხელბურთში 19 წლამდელთა ევროპის ჩემპიონატს. გვაქვს ინფრასტრუქტურის მოწყობის ვალდებულება. უმნიშვნელოვანესია, რომ 130 მილიონზე მეტი ინვესტიცია ხორციელდება. ეს ხელს შეუწყობს, რომ მაღალ დონეზე გავუძღვეთ ამ ღონისძიებას. ბოლო ოთხი წლის მანძილზე სხვადასხვა სპორტული ღონისძიებებისა და ინფრასტრუქტურის მიმართულებით სახელმწიფოსგან ნახევარ მილიარდზე მეტი დაიხარჯა. ეს უმნიშვნელოვანესი მხარდაჭერააა ქართული სპორტის განვითარებისთვის და შესაბამისი შედეგია. საქართველო ფაქტობრივად რეგიონალური ცენტრი გახდება“, - განაცხადა ტარიელ ხეჩიკაშვილმა.

პრემიერ-მინისტრის თქმით, მნიშვნელოვანია, რომ აღნიშნული სპორტული ინფრასტრუქტურა მოსახლეობისთვის ხელმისაწვდომი იყოს.

„ეს ძალიან კარგია და მოსახლეობის გაჯანმრთელებაში მნიშვნელოვან როლს შეასრულებს. იქნება მოძებნილი საჯარო და კერძო სექტორს შორის პარტნიორობის სწორი მოდელი იმისთვის, რომ ეს სერვისები მოსახლეობის ფართო ფენებისთვის უკვე შემდგომ ხელმისაწვდომი იყოს. მეორეს მხრივ, უნდა იყოს ჯანსაღი ბიზნეს მოდელი, რომელზეც იმართება ინფრასტრუქტურა, ვინაიდან სახელმწიფო არ უნდა გახდეს კონკურენტი უკვე არსებული ინფრასტრუქტურისა“, - აღნიშნა გიორგი კვირიკაშვილმა.

INFO9