ინგლისის რაგბის კავშირი ექვს ერში განსახორციელებელ შესაძლო ცვლილებებს მხარს არ დაუჭერს.

„რატომ უნდა შევცვალოთ ის, რაც ძალიან კარგად მუშაობს?“ - განაცხადა ინგლისის რაგბის კავშირის აღმასრულებელმა დირექტორმა იან რიჩმა BBC-თან საუბარში.

ამ პასუხში რაგბის ქართველი გულშემატკივრისთვის ყველაზე ცუდი ისაა, რომ შესაძლოა, „ბორჯღალოსნები“ თებერვალ-მარტში კვლავაც დარჩნენ მაღალი დონის თამაშების გარეშე. გლობალურად, საუბარია „მსოფლიო რაგბის“ ხელმძღვანელის, ბილ ბომონტის თხოვნაზე, რომელიც ექვსი ერის ორგანიზატორებს ტურნირის ჩატარების ვადების აპრილში გადაწევისკენ მოუწოდებდა. როგორც ჩანს, ეს არ მოხდება და ექვსი ერის ვადებად ძველებურად თებერვალ-მარტი დარჩება. რიჩის თქმით, ვადების შეცვლით სამხრეთ ნახევარსფეროსთან თამაშების კუთხით რაიმე გაუმჯობესების შესაძლებლობა არ იკვეთება და ამდენად, ცვლილებების განხორციელება უაზროდ მიაჩნია.

„ჩვენ გვაქვს სატელევიზიო კონტრაქტები და უამრავი ტელემაყურებელი, ასევე სტადიონები, რომლებიც ყოველ თამაშზე პირთამდე ივსება. ასე, რომ რაიმეს შესაცვლელად ნებისმიერი ნაბიჯის გადადგმას ვეწინააღმდეგები“ - ამბობს ინგლისელთა წარმომადგენელი.

ნებისმიერ შემთხვევაში, 2019 წლის მსოფლიო თასამდე არაფერი შეიცვლება. თუმცა, უახლოესი ექვსი-ცხრა თვის განმავლობაში, ჩრდილოეთ და სამხრეთ ნახევარსფეროს წამყვანი ნაკრებების წარმომადგებლები უნდა შეთანხმდნენ იმ საერთაშორისო კალენდარზე, რომელიც 2027 წლამდე იმუშავებს. სამხრეთელებს სურთ, რომ ივნისის ტესტ-სერიების ჩატარების ვადა ივლისში გადავიდეს, რათა უწვეტად გახდეს შესაძლებელი სუპერ რაგბის სეზონის ჩამთავრება. რა თქმა უნდა, ეს ცვლილება ჩრდილოელთა თანხმობის გარეშე ვერ მოხდება.

ზურა ქსოვრელი