ევროპული ექვსი ერისგან განსხვავებით, სამხრეთელ ბობოლებს კარგად ესმით რაგბის გლობალიზაციის მნიშვნელობა და ეგრეთწოდებული მეორე და მესამე დონის სარაგბო ქვეყნების გაძლიერებაზე ზრუნვას განაგრძობენ.

ამის მაგალითი იყო და არის იაპონიის სუპერ რაგბიში ჩართვა, ამავე ტურნირში კუნძულელების [სამოა, ფიჯი, ტონგა] ფრანშიზის დამატებაზე ზრუნვა და ამერიკის ექვსი ერის დაარსება, რომელიც წელს პირველად ჩატარდა და რომელშიც არგენტინის, აშშ-ს, კანადის, ურუგვაის, ჩილეს და ბრაზილიის ნაკრებები თამაშობენ.

ახლა არგენტინელი ძმები - ფილიპ და მანუელ კონტეპომები, რომლებიც 2007 წლის მსოფლიო თასზე გუნდთან ერთად ბრინჯაოს მედლების მფლობელები გახდნენ, სამხრეთ ამერიკაში ახალ პროექტს იწყებენ. ისინი პირველად ურუგვაის რაგბის ისტორიაში, ამ ქვეყანაში რაგბის აკადემიას დაარსებენ, სადაც ტოპ-დონის მოთამაშეები გაიზრდებიან.

აკადემიაში ორი ასაკობრივი ჯგუფი იქნება: 9-იდან 12-მდე და 14-იდან 19-წლამდე. აკადემიის გახსნა 21-23 ოქტომბერს იგეგმება. შეგახსენებთ, რომ ამა წლის დასაწყისში არგენტინისა და ურუგვაის რაგბის კავშირებმა ურთიერთთანამშრომლობის გრძელვადიანი შეთანხმება გააფორმეს.

ზურა ქსოვრელი