იტალიური პრესა ვარაუდობს, რომ უახლოეს პერიოდში ქართული კლუბების მხრიდან ევროთასებისადმი დამოკიდებულება შეიცვლება.

მიზეზად რა თქმა უნდა ექვს ერში საქართველოს მიღების სურვილი სახელდება: ქვეყანას, რომელსაც ევროთასების მიმართ ასეთი დამოკიდებულება აქვს, ექვს ერში ვერ მოხვდება. თუ ჩელენჯ ქაფის საკვალიფიკაციო ეტაპზე თამაშის ფული არ აქვთ, საიდან გამონახავს საქართველოს რაგბის კავშირი ექვს ერში თამაშის სახსრებს? - კითხულობენ იტალიელი ჟურნალისტები.

„ეჭვგარეშეა, რომ აუცილებლად უნდა ჩაერთონ ქართული კლუბები ევროთასებში. საჭიროა დავსვათ კითხვა - რა სჯობს განვითარების კუთხით, მოვაწყოთ ძვირადღირებული ტურები საფრანგეთში საქართველოს ახალგაზრდული ნაკრებებისთვის თუ ვითამაშოთ ჩელენჯ ქაფზე?“ - გადმოსცემს საქართველოს ნაკრების მთავარი მწვრთნელის, მილტონ ჰეიგის სიტყვებს The Rugby Paper-ი.

მისივე თქმით, ადრე საქართველოს მთავრობა, რომელიც ქართული რაგბის მთავარი დამფინანსებელია, პირველი ვარიანტისკენ იხრებოდა, თუმცა, ბოლო დროს პრიორიტეტები შეიცვალა და დიდი ალბათობით, ქართული კლუბების ევროთასებში ჩართვის პროექტი ამოქმედდება.

„ზაფხულის ტესტ-სერიისას წყნარი ოკეანის კუნძულებიდან ტრიუმფალური დაბრუნების შემდეგ, ჩელენჯ ქაფის საკვალიფიკაციო ტურნირში ჩართვა ჩვენი შემდგომი განვითარებისთვის კიდევ ერთი დიდი ნაბიჯი იქნება“ - აკონკრეტებს ჰეიგი.

„ბორჯღალოსნების“ მწვრთნელი არ გამორიცხავს, რომ ბოლო წლებში საქართველოს უცვლელი ჩემპიონი „ლელო-სარასენსი“ ჩელენჯ ქაფის საკვალიფიკაციო ტურნირში ამავე სეზონში ვიხილოთ. ამავდროულად, მილტონი ამბობს, რომ უკეთესი იქნება თუ ტურნირში ქართული კლუბების ნაკრები ჩაერთვება.

შეგახსენებთ, რომ 2014 წელს, როდესაც ჩელენჯ ქაფის საკვალიფიკაციო ეტაპი პირველად ჩატარდა, მასში მონაწილეობა კლუბების ნაკრებმა, თბილისის „კავკასიელებმა“ მიიღო და ორი მატჩის ჯამში მცირედით დამარცხდა იტალიურ „როვიგოსთან“ – 18:22 და 21:24. იმავე სეზონში იტალიის რაგბის კავშირის პრეზიდენტი ალფრედო გავაცი კატეგორიულად მოითხოვდა, რომ გათამაშებაში კონკრეტული კლუბები ჩართულიყვნენ და არა ეგრეთწოდებული ფრანშიზები, როგორც საქართველოს და რუმინეთის შემთხვევაში იყო.

ჰეიგი მიიჩნევს, რომ შესაბამისი გაძლიერების გარეშე, „ლელო-სარასენსი“ რუმინეთის სუპერლიგის კლუბებს ღირსეულ წინააღმდეგობას ვერ გაუწევს, რომლის შემადგენლობაშიც ავსტრალიელი, ახალ ზელანდიელი, სამხრეთ აფრიკელი და წყნარი ოკეანის წარმომადგენლები მრავლად თამაშობენ.

ჩელენჯ ქაფის გასულ გათამაშებაში 8 გუნდმა მიიღო მონაწილეობა, მათ შორის ბელგიიდან, გერმანიიდან, პორტუგალიიდან და ესპანეთიდან. რომელი ქვეყნის წარმომადგენლები ითამაშებენ წლევანდელ ტურნირში და როგორი იქნება მისი ფორმატი, ჯერჯერობით უცნობია.

ზურა ქსოვრელი