საქართველოს ექვს ერში ჩართვა გარდაუვალია და დროის საკითხია! თუ წლების წინ ამაზე ფიქრიც კი დიდ ცოდვად ითვლებოდა, ახლა მსგავსი მოთხოვნა ყველა წამყვანი საინფორმაციო საშუალებიდან ისმის და ამის შესაძლებლობას უკვე თავად ტურნირის ორგანიზატორებიც ოფიციალურად განიხილავენ!

თვის ბოლოს ექვსი ერის წარმომადგენლებს ოფიციალური, გეგმიური შეხვედრა ექნებათ, სადაც განვლილ ტურნირს და სამომავლო გეგმებს განიხილავენ. უელსის რაგბის კავშირის წარმომადგენელი არ მალავს, რომ უახლოეს შეხვედრაზე განსახილველი სამი ძირითადი საკითხი იქნება - ტურნირის ჩატარების ვადების აპრილის თვეში გადაწევა, ბონუს-ქულების სისტემის დანერგვა და ქვედა დივიზიონთან, ანუ ერთა თასთან ასვლა-გავარდნის დანერგვა.

Walesonline-მ ამ თემას სპეციალური სტატია მიუძღვნა:

„სამივე საკითხს მომხრეები და მოწინააღმდეგეები ყავს. ექვსი ერის აპრილის თვეში გადაწევა იქნება პირველი ნაბიჯი გლობალური კალენდრის შექმნისკენ, რაც ჩრდილოეთ ნახევარსფეროს ნაკრებების მოთამაშეებს გაზრდილი დატვირთვების შემცირების საშუალებას მისცემს; საქართველოს ნაკრების გამოსვლამ გასულ მსოფლიო თასზე, ექვსი ერის დახურული კარის გახსნის აუცილებლობა წარმოაჩინა; ბონუს-ქულების დანერგვა ევროპულ რაგბის უფრო შემტევს და სანახაობრივს გახდის.

„ექვსი ერის წარმომადგენლები თვის ბოლოს შევიკრიბებით. ეს იქნება ყოველწლიური შეხვედრა, რათა დავინახოთ, თუ სად ვიმყოფებით“ - ამბობს უელსის რაგბის კავშირის თავკაცი გარეთ დევისი და განაგრძობს - „ღირს თუ არა ტურნირის ჩატარების ვადების გადაწევა? უნდა დავნერგოთ თუ არა ბონუს-ქულების სისტემა, რასაც ხალხი ითხოვს, რათა თამაშები უფრო სანახაობრივი გახდეს? უნდა დარჩეს ექვსი ერი დახურულ ორგანიზაციად, თუ გავუღოთ კარი საქართველოს, რუმინეთს, ან იმ ქვეყნებს, რომლებიც ამას დაიმსახურებენ? ეს ის საკითხებია, რომლებსაც განვიხილავთ.

ვადების გადაწევაში პრობლემას ვერ ვხედავ, თუკი ის სხვა საკითხების მოგვარებაში დაგვეხმარება. დღესდღეისობით ტურნირს უამრავი გულშემატკივარი და ტელემაყურებელი ყავს, მაგრამ თუ ამით სამხრეთ და ჩრდილოეთ ნახევარსფეროს სარაგბო სეზონის გამთლიანება მოხდება, ამის გაკეთება ღირს. ვაწარმოებთ მოლაპარაკებას ჩვენს ზელანდიელ კოლეგებთან და განვიხილავთ გლობალური კალენდრის შექმნის შესაძლებლობას. ამ ცვლილების უმთავრესი მოტივაცია მოთამაშეთა კეთილდღეობაა, რათა მათ თამაშების რაოდენობა შეუმცირდეთ. ჩვენი ბიჭები ივნისის ბოლომდე ახალ ზელანდიაში იმყოფებოდნენ, მაშინ, როდესაც ვარჯიში შარშან ივნისში დაიწყეს. გამოდის, რომ ისინი გადაბმულად 13 თვის განმავლობაში ვარჯიშობდნენ და ასე არ შეიძლება“.

შესაძლო გავარდნაზე და იტალიაზე ზეწოლაზე დევისი ამბობს: „მთლიანობაში, 2000 წლიდან დღემდე, იტალია ყველაზე ბევრჯერ გახდა „ხის კოვზის“ მფლობელი, მაგრამ სხვა გუნდებსაც ჰქონდათ სუსტი სეზონი, მაგალითად შოტლანდიას ორი წლის წინ. არ შეიძლება იტალიისკენ თითის გაშვერა, თუმცა ისინი ყველაზე მგრძნობიარენი არიან ამ საკითხთან მიმართებაში. მაგრამ მნიშვნელოვანია ტურნირის გახსნაზე მსჯელობა და ეს საუბარი აუცილებლად შედგება“.

განვიხილოთ სამივე საკითხი, თავისი დადებითი და უარყოფითი მხარეებით და გამოვიტანოთ ვერდიქტი ყველა იმ საკითხთან დაკავშირებით, რომელზეც ექვს ერში ამ თვის ბოლოს იმსჯელებენ:

ექვსი ერის ჩატარების ვადების შეცვლა

დადებითი: „მსოფლიო რაგბის“ თავმჯდომარეს, ბილ ბომონტს სურს ერთიანი სეზონი, რათა დაიცვას მოთამაშეები ტრავმებისგან. ამის აუცილებლობა 2015/2016 წლების სეზონის შემდეგ განსაკუთრებით გამოჩნდა, რადგან ჩრდილოეთ ნახევარსფეროს წამყვანი ქვეყნების მოთამაშეებისთვის სეზონი მთელი 13 თვე გაგრძელდა. თუ ექვსი ერის ვადების გადატანით ჩვენს ვარსკვლავურ მოთამაშეებს დატვირთვები შეუმცირდებათ, ის მხარდაჭერილი უნდა იყოს. ეს ევროთასებისა და შიდა ჩემპიონატების ორგანიზატორებს კალენდრის დალაგების საშუალებას მისცემს.

უარყოფითი: არგუმენტი, რომ ტურნირის ჩატარების ვადების აპრილში გადაწევა დატვირთვებს შეამცირებს, არც ისე მყარია. რა არის ამის გარანტი?

ვერდიქტი: მოთამაშეებისთვის და გულშემატკივრებისთვის ფრაგმენტებად დაყოფილ სეზონზე უარესი არაფერია. მათ გადართვა უწევთ ერთი ტურნირიდან მეორეზე და პირიქით. საჭიროა გამოინახოს კომპრომისი და თუ იქნება სურვილი, 2020 წლამდეც შესაძლებელია ამ ცვლილების განხორციელება.

ბონუს-ქულები

დადებითი: გახსოვთ როგორი მაგარი იყო 2015 წლის ექვსი ერის დასკვნითი შაბათი? უელსმა იტალია რომში 61:20 დაამარცხა, მაშინ, როდესაც ირლანდიამ „მარიფილდზე“ 40:10 აჯობა შოტლანდიას, ხოლო ინგლისმა საფრანგეთი 55:35 დაამარცხა, თუმცა ირლანდიელებს ქულების სხვაობით მაინც ვერ გაუსწრო. ბონუს-ქულების მომხრეები წინასწარმეტყველებენ, რომ პრემიალური ქულის ძიებაში მსგავსი თამაშები ხშირი იქნება.

უარყოფითი: კრიტიკოსები სამართლიანად ამბობენ, რომ იმ გუნდებს, რომლებსაც სამი თამაშის ჩატარება უწევთ საკუთარ მოედანზე, სხვებთან შედარებით უპირატესობა ექნებათ, რადგან ჩვეულ გარემოში ლელოების გატანა უფრო მარტივია. გარდა ამისა, რომში მარტის მზიან დღეში ლელოები ადვილად იდება, ვიდრე წვიმიან „მარიფილდზე“.

ვერდიქტი: ბონუს-ქულებს ერთი დიდი მინუსი აქვს და ჩემთვის ამ საკითხს საბოლოოდ ხურავს. გუნდმა ტურნირი შესაძლოა „დიდი სლემით“ დაასრულოს და ვერ გახდეს ჩემპიონი. საფრანგეთმა 2002 წელს ექვსი ერი 10 ქულით დაასრულა, მაგრამ პრემიალურ ქულას მხოლოდ ირლანდიის 49:5 ძლევისთვის მიიღებდა. ინგლისმა ის წელიწადი ოთხი მოგებით და 8 ქულით მეორე ადგილზე დაასრულა, მაგრამ მოგების ბონუსს აიღებდა იტალიასთან, უელსთან, შოტლანდიასთან და ირლანდიასთან, ასევე 15:20 მარცხისთვის საფრანგეთთან და ამრიგად, 13 ქულით ტიტულს დაეუფლებოდა.

გავარდნა და დაწინაურება

დადებითი: მოცემული მომენტისთვის ექვსი ერი დახურული ჩემპიონატია, რაც კომფორტულ გარემოს ქმნის „ხის კოვზის“ მფლობელისთვის. ქვედა ლიგაში გავარდნის, ან ერთა თასის გამარჯვებულთან პლეი ოფის სისტემის დანერგვა და დაქვეითების საფრთხე, ბოლოადგილოსანს სერიოზულ ფინანსურ დანაკარგს მოუტანს, რაც მათ მონდომებას გაზრდის. გარდა ამისა, საქართველოსა და რუმინეთს არ უნდა წაერთვას განვითარების უფლება, რაც უმაღლესი ეშელონის გუნდებთან რეგულარული თამაშით მიიღწევა. ახლა მათ ამის შესაძლებლობა მხოლოდ მსოფლიო თასზე აქვთ.

უარყოფითი: თბილისში, გნებავთ ბუქარესტში გასეირნება, გულშემატკივრისთვის ვერ იქნება უფრო მომხიბვლელი, ვიდრე გაზაფხულის რომში ჩასვლა, ან მეზობელ ედინბურგში სტუმრობა. საქართველო საშინაო მატჩებისას სტადიონს ავსებს, მაგრამ რამდენი ადამიანი მივა კარდიფში საქართველოსთან, ან რუმინეთთან თამაშის სანახავად? ნახევრად ცარიელი ტრიბუნები დიდი დარტყმა იქნება უელსის რაგბის კავშირის ბიუჯეტისთვის.

ვერდიქტი: უახლოეს პერიოდში ექვს ერში გავარდნა-ასვლის სისტემის დანერგვის ალბათობაზე უკანასკნელ დოლარს არ დავდებდი. უფრო მისაღები სცენარია, რომ ტურნირი გაფართოვდეს შვიდ ერამდე და მხოლოდ ამის შემდეგ დაინერგოს ასვლა-ჩასვლის სისტემა“.

მოამზადა ზურა ქსოვრელმა