„ბულზის“ იმედები, რომ „სანვულვზი“ სასწაულს ჩაიდენდა და „შარქსს“ დურბანში გამარჯვებას არ დაანებებდა არ გამართლდა. იაპონელებმა „ზვიგენებს“ პირველ 40 წუთში დიდი წინააღმდეგობა გაუწიეს და მეორეშიც ღირსეულად ითამაშეს, მაგრამ საბოლოოდ ასე საჭირო მოგება მასპინძლებს დარჩათ - 40:29.

სამხრეთ აფრიკის კონფერენციაში „ხარები“ დასკვნითი ტურის წინ „ზვიგენებს“ ორი ქულით ჩამორჩებოდა და იმისათვის, რომ პლეი ოფში გასვლის შანსი შერჩენოდა, კონკურენტს დებიუტანტთან ვერ უნდა მოეგო. მაგრამ ასე არ მოხდა, „შარქსმა“ მოსაგები მოიგო და ხვალინდელი თამაშების შედეგებიდან გამომდინარე, მომავალ კვირაში იოჰანესბურგში, ან ახალ ზელანდიაში წავა.

აფრიკელებმა ორივე ტაიმის დებიუტი კარგად ჩაატარას. სასტარტო სასტვენიდან სულ რაღაც 8 წუთი იყო გასული და ოსტჰეიზენმა და მვოვომ ლელოები დადეს, ხოლო ეპრილმა გარდასახვები ზუსტად შეასრულა - 14:0. „სანვულვზმა“ ლელოთი მე-14 წუთზე უპასუხა, შიგენომ ხაზი გაჭრა და ტამურამ გარდასახა, თუმცა 21-ე წუთზე პიტერსენმა ლელოთი და ეპრილმა გარდასახვით მასპინძლებს 14-ქულიანი უპირატესობა დაუბრუნეს. მთელი ეს პერიოდი „შარქსი“ საგრძნობ უპირატესობას ფლობდა და დამსახურებულად იგებდა, მაგრამ ტაიმის ბოლო „სანვულვზის“ იყო და 36-ე წუთზე პაეამ, ხოლო გაწითლებულ დროზე ლემალუმ ლელოებს ანგარიში გაათანაბრეს. ერთი ეგაა, ტამურას ერთი გარდასახვა გაუფუჭდა - 21:19.

შესვენებაზე „ზვიგენები“ გამოფხიზლდნენ და მეორე ტაიმის დებიუტში ესტერჰაუზენმა მასპინძელთა მეოთხე ლელო დადო. ეპრილი გარდასახვიდან კვლავ ზუსტი იყო, ტამურამ საათის თავზე ჩამორჩენა ჯარიმით შეამცირა, თუმცა ეპრილმა 71-ე და ბოშმა 76-ე წუთზე ლელოები მიითვალეს, რითაც მატჩის ბედი გადაწყვიტეს - 40:22. სულ ბოლოს პაეამ დუბლი შეასრულა და ჩამორჩენა 11 ქულამდე შეამცირა, მაგრამ ამით არაფერი შეცვლილა და „სანვულვზმა“ სადებიუტო სუპერ რაგბი ბოლო, მე-18 ადგილზე დაასრულა.

ზურა ქსოვრელი