საქართველოს მორაგბეთა 7-კაცა ნაკრები ევროპის გრან პრის დასკვნით, მესამე ეტაპზე პოლონეთის ქალაქ გდანსკში საფრანგეთის, დიდი ბრიტანეთის ლაიონსის და მასპინძელთა გუნდის წინააღმდეგ ითამაშებს.

კახა ალანიას შეგირდებმა პირველ, მოსკოვის ეტაპზე მეექვსე ადგილი დაიკავეს, ხოლო ორი დღის წინ ექსეტერში მხოლოდ მერვე ადგილზე გავიდნენ. შედეგად, ორი ეტაპის ჯამში 16 ქულით მეშვიდე პოზიციაზე იმყოფებიან და 8-8 ქულით ჩამორჩებიან ესპანეთს და გერმანიას, რომლებიც გაისად მარტში ჰონკონგში გასამართი მსოფლიო სერიის შესარჩევი ეტაპისთვის მთავარი კონკურენტები არიან.

უფრო კონკრეტულად, ევროპის გრან პრი ევროპის ჩემპიონატის გარდა მსოფლიო სერიის შესარჩევი ეტაპიცაა. სერიის მონაწილე ოთხი გუნდის გარდა - საფრანგეთი, რუსეთი, ინგლისი და უელსი, ანუ ბრიტანეთის ორი გუნდი, ორი მოწინავე ჰონკონგის საგზურს მიიღებს, სადაც სერიის დასკვნითი შესარჩევი ეტაპი გაიმართება. ამჟამად მოწინავე ორ ადგილს ესპანეთი და გერმანია იკავებენ და რადგან სხვაობა 8 ქულაა, საქართველომ აუცილებლად უნდა შეძლოს მინიმუმ თასის ნახევარფინალში თამაშის უფლების მოპოვება და ესპანეთი-გერმანიიდან ერთ-ერთმა პოლონეთში წარუმატებლად ითამაშოს.

გდანსკის ეტაპი 16-17 ივლისს გაიმართება და ჯგუფურ ეტაპზე გუნდები ასე დაწყვილდნენ: A ჯგუფი - დიდი ბრიტანეთი როიალსი, გერმანია, იტალია, ლიტვა; B ჯგუფი - საფრანგეთი, დიდი ბრიტანეთი ლაიონსი, საქართველო და პოლონეთი; C ჯგუფი - ესპანეთი, რუსეთი, პორტუგალია და ბელგია.

ჯგუფური ეტაპის დასრულების შემდეგ, ორ-ორი საუკეთესო და ორიც საუკეთესო მესამეადგილოსანი თასის მეოთხედფინალში ითამაშებს, ხოლო დანარჩენი 4 IX-XII ადგილებს გაითამაშებს. სამი ეტაპის ჯამში ბოლო ადგილზე გასული გუნდი გრან პრის დატოვებს და მის ადგილს ირლანდია დაიკავებს, რომელმაც ქვედა დივიზიონი მოიგო.

საქართველოს ნაკრებმა ექსეტერის ეტაპზე ასეთი შემადგენლობით ითამაშა: დავით ლოსაბერიძე (აია), რევაზ ჯინჯიხაძე (ჯიქი), ნიკა გიგაური (არმაზი), ზურაბ ძნელაძე (ლოკომოტივი), ლევან გოგოლაშვილი (ლოკომოტივი), იოსებ მათიაშვილი (აკადემია), მიხეილ გაჩეჩილაძე (ყოჩები), მამუკა ნინიძე (ჯიქი), იოსებ კიკვიძე (აია), გიორგი შკინინი (ლოკომოტივი), ირაკლი გეგენავა (ყოჩები), ბექა ურჯუკაშვილი (არმია). პოლონეთში რაზმს გიორგი ფრუიძე დაემატება. გუნდი უკვე ადგილზეა და მომავალი თამაშებისთვის ემზადება.

საერთო ცხრილი ორი ეტაპის შემდეგ

საფრანგეთი 18+18=36

რუსეთი 20+14=34

დიდი ბრიტანეთი როიალსი 12+20=32

დიდი ბრიტანეთი ლაიონსი 16+12=28

ესპანეთი 8+16=24

გერმანია 14+10=24

საქართველო 10+6=16

იტალია 4+8=12

პორტუგალია 6+4=10

ბელგია 3+3=6

პოლონეთი 2+2=4

ლიტვა 1+1=2

ზურა ქსოვრელი