შოტლანდიის რაგბის კავშირმა დღეს დაადასტურა, რომ 26 ნოემბერს მათი ქვეყნის ეროვნული გუნდი საქართველოს ნაკრებს კილმარნოკში, „რაგბი პარკზე“ დაუხვდება, რომელიც 18 ათას გულშემატკივარს იტევს და თამაში ადგილობრივი დროით 14:30 საათზე დაიწყება.

ამ სტადიონზე სქოთების უპირველეს გუნდს ერთადერთხელ, 2014 წელს უთამაშია და მაშინ ტონგა 37:12 დაამარცხა. სტადიონზე მესამე თაობის ხელოვნურსაფარიანი მოედანია და ეს იქნება პირველი შემთხვევა, როდესაც პირველი დონის სარაგბო ნაკრები სრულად ხელოვნურსაფარიან მოედანზე ითამაშებს. შოტლანდიური რაგბის უფროსი ოფიცერი დომინიკ მაკქეი რეგიონებში ნაკრების თამაშების გატანით ქვეყანაში სპორტის ამ სახეობის პოპულარიზაციას იმედოვნებს:

„მოხარულები ვართ იმით, რომ შემოდგომის ტესტებზე შოტლანდია საქართველოს კილმარნოკში უმასპინძლებს. აქ გუნდმა პირველად2014 წელს, ტონგას წინააღმდეგ ითამაშა და ეს ნაბიჯი წარმატებული აღმოჩნდა, რადგან მაშინ შეხვედრას 16 ათასი გულშემატკივარი დაესწრო. მნიშვნელოვანია, რომ საერთაშორისო თამაშები შოტლანდიის მთელ ტერიტორიაზე ჩატარდეს, რათა გაიზარდოს ქვეყანაში რაგბის პოპულარიზაცია. ვიმედოვნებთ, რომ ეროვნული გუნდის ეირშირში თამაში ახალ აუდიტორიას მოიზიდავს და რაგბისადმი ინტერესი გაიზრდება. ბილეთების შესაძენად ქომაგებს რამდენიმე ვარიანტს შევთავაზებთ, რათა მათ ოჯახებით შეძლონ სტადიონზე მისვლა“.

წარმოშობით ეირშირელი, შოტლანდიის ნაკრების ბურჯი გორდონ რიდი ამბობს:

„რაგბი პარკი“ ფანტასტიური სპორტული ნაგებობაა. იქ შოტლანდიის ნაკრების თუ „გლაზგო უორიორსის“ მაისურით თამაშისას მუდამ უდიდეს სიამოვნებას ვიღებდი. თამაშის დღეს საოცარი ატმოსფეროა. პირადად მე ხელოვნურ საფარზე თამაში ძალიან მომწონს და ეს „რაგბი პარკის“ კიდევ ერთი პლიუსია. ასეთი მოედანი ხელს უწყობს სწრაფ თამაშს და მაყურებელი ნასიამოვნები დარჩება. გარდა ამისა, ადგილობრივებისთვის შესანიშნავი შესაძლებლობაა ეზიარონ საერთაშორისო რაგბის და დარწმუნებული ვარ, სტადიონი პირთამდე შეივსება“.

ეირშირი მეცხრე რეგიონია, სადაც შოტლანდიის ნაკრებს საშინაო შეხვედრა ჩაუტარებია. ამ სტადიონზე გასულ სეზონში შალვა მამუკაშვილის „გლაზგო უორიორსმა“ ორი შეხვედრა ჩაატარა, მათ შორის ერთი ჩემპიონთა თასზე ამა წლის იანვარში და ტურნირის მომავალი ფინალისტი, ტოპ 14-ის გამარჯვებული „რასინგი“ 22:5 დაამარცხა.

სტადიონი შოტლანდიურ საფეხბურთი კლუბ „კილმარნოკს“ ეკუთვნის და მენეჯერი ლი კლარკი მოხარულია, რომ მათ სტადიონზე შოტლანდიის მორაგბეთა ეროვნული ნაკრები ითამაშებს:

„მოხარულები ვართ შოტლანდიის მორაგბეთა ნაკრებმა „რაგბი პარკზე“ დაბრუნება რომ გადაწყვიტა. ეს იქნება მეოთხე პრესტიჟული, სარაგბო მატჩი მას შემდეგ, რაც ხელოვნური მოედანი მოვაწყეთ. ჩვენი სინთეთიკური საფარი სრულად შეესაბამება „მსოფლიო რაგბის“ მოთხოვნებს, რომელიც უფრო მკაცრია მოთხოვნებში, ვიდრე ფიფა. ესაა იდეალური ადგილი შემოდგომის ტესტებისთვის. მე რაგბის დიდი ქომაგი ვარ და დარწმუნებული ვარ, თამაშის დღეს ტრიბუნები შეივსება. ის ადამიანები, რომლებიც ამავე დღეს საფეხბურთო გუნდს „აბერდინთან“ გასამართი შეხვედრისთვის ვერ გაყვებიან, დარწმუნებული ვარ ტრიბუნებზე იქნებიან“.

შოტლანდიის ნაკრები შემოდგომის ტესტ-სერიას 12 ნოემბერს ავსტრალიასთან, „მარიფილდზე“ იწყებს, 19 ნოემბერს იქვე არგენტინას დაუხვდება და დასკვნით მატჩს საქართველოსთან გამართავს. საქართველოსა და შოტლანდიის მატჩისთვის ბილეთების გაყიდვა 20 ივლისს, დილის 10 საათზე დაიწყება და უფროსებისთვის მისი ფასი 15 ევრო, ხოლო 18-წლამდე ახალგაზრდებისთვის 10 ევრო იქნება. შესაძლებელია ოჯახური ბილეთის შეძენაც - ორი უფროსი და ორი უმცროსი ასაკის ადამიანისთვის და მათი საერთო ღირებულება 40 ევრო იქნება. ვარაუდობენ, რომ ბილეთების მარაგი უმოკლეს ვადაში ამოიწურება და დროის მხრივ გაყიდვების რეკორდი დამყარდება.

ზურა ქსოვრელი