ფიჯის ნაკრების მთავარი მწვრთნელი ჯონ მაკქი მიიჩნევს, რომ საკუთარ მოედანზე საქართველოს ნაკრებთან განცდილი მარცხი მისი გუნდისთვის გაკვეთილი უნდა იყოს.

ახალი ზელანდიის რადიოს მიერ გამოქვეყნებულ სტატიაში მაკქი მატჩში „ბორჯალოსნების“ დომინირებაზე საუბრობს:

„რა თქმა უნდა, ქართველებმა უკეთ ითამაშეს, განსაკუთრებით მათი შერკინება იყო ძლიერი. მთელი მატჩის განმავლობაში წნეხის ქვეშ გვამყოფეს და შედეგიც მიიღეს.

როდესაც ტონგასთან და სამოასთან ვთამაშობთ, მატჩის ხასიათიდან გამომდინარე შანსი გვეძლევა რამდენიმე ფაზა გადავაბათ და მოვნახოთ მეტოქის დაცვაში სივრცეები. საქართველოს ნაკრები კი თავად აკონტროლებდა შეხვედრის ტემპს, არ მოგვცეს საშუალება ჩვენი რომელიმე იმპულსი გამოგვეყენებინა. ეს მარცხი ჩვენთვის გაკვეთილი უნდა იყოს.

პრობლემა იყო ისიც, რომ სხვადასხვა მიზეზთა გამო რამდენიმე წამყვანი მოთამაშე გვაკლდა. ჩვენთვის ამ ეტაპზე შვიდკაცა რაგბი პრიორიტეტულია და ამიტომაც, გადავწყვიტეთ რადენიმე მორაგბე შვიდკაცას ნაკრებისთვის დაგვეთმო“.

შეგახსენებთ, რომ ფიჯის ნაკრებმა 2016 წლის ოკეანეთის ერთა თასი მოიგო, თუმცა ივნისის ბოლო მატჩი „ბორჯღალოსნებთან“ საკუთარ მოედანზე 3:14 დათმო.

უჩა გოგიძე