საქართველოს ეროვნული ნაკრები წყნარი ოკეანის კუნძულებიდან გუშინ საღამოს დაბრუნდა და გულშემატკივარმა მას მადლიერების ნიშნად აეროპორტში დახვედრა მოუწყო.

ოკეანეთის ტურნეში „ბორჯღალოსნებმა“ გულშემატკივართა გაოცება პირველი მატჩით დაიწყეს, სადაც სამოასთან დაძაბულ შეხვედრაში 19:19 ითამაშეს და ეს იყო სასიამოვნო დასაწყისი. მიუხედავად იმისა, რომ ნაკრებს რამდენიმე წამყვანი მორაგბე ვერ ეხმარებოდა, მათ ქართველ ქომაგს გული არ დაწყვიტეს და მეორე თამაში ტონგას 23:20 მოუგეს. ეს მოგება ბევრს არ გაკვირვებია, რადგან ისინი მსოფლიო თასზეც დავამარცხეთ. საფინალო მატჩი ფიჯისთან გველოდა. პირველად ფიჯელებს 2012 წელს დავუპირისპირდით, თამაში „მიხეილ მესხის“ სტადიონზე გაიმართა და მეტოქემ საკუთარ კედლებშითამაში 19:24 დაგვათმობინა, ახლა კი, სცენარი შეიცვალა და „ბორჯღალოსნებმა“ და ფიჯი სტუმრად 14:3 დაამარცხეს.

რაგბიში განვითარებულ სიახლეებზე კომენტარი რაგბის პრეზიდენტთან ერთად მორაგბეებმაც გააკეთეს:

გოჩა სვანიძე (სრკ-ს პრეზიდენტი): „პირველ რიგში გილოცავთ ამ გამარჯვებას. ეს არა მარტო მორაგბეების, არამედ ქვეყნის გამარჯვებაა. ჩვენმა ხასიათმა, შრომისუნარიანობამ, შრომისმოყვარეობამ და სწორად დაგეგმილმა პროცესმა, განაპირობა შედეგი, რომელსაც ახლა ვზეიმობთ. ეს გახლდათ გუნდისთვის კარგი მოსამზადებელი პერიოდი, ჩვენ შედეგი არ დაგვიგეგმავს და სასიამოვნო მოულოდნელობა იყო“.

შალვა სუთიაშვილი (კაპიტანი): „ჩვენ წავედით გასამარჯვებლად, სამოასთან მოგება დაგეგმილი იყო, რადგან გვინდოდა რეიტინგში მეათე ადგილზე გასვლა. რა თქმა უნდა მეთერთმეტეც ძალიან კარგი შედეგია, რისთვისაც დიდი მადლობა ბიჭებს. ნოემბრის ტესტ-მატჩებზე შემიძლია ვთქვა, რომ ვიბრძოლებთ ადგილის შესანარჩუნებლად და ასევე გასაუმჯობესებლად“.

დავით კაჭარავა: „საკმაოდ რთული ტურნირი იყო, გამომდინარე იქიდან, რომ ძალიან ბევრი მგზავრობა მოგვიწია. გარდა ამისა, მეტოქეებიც ძლიერები იყვნენ. ვფიქრობ, რომ მაქსიმალური შედეგი დავდეთ - ერთი ფრე და ორი გამარჯვება ძალიან კარგი შედეგია. საქართველო პირველად არის მსოფლიო რაგბის რეიტინგში მეთერთმეტე ადგილზე და გილოცავთ ამ მშვენიერ პოზიციას“.

მერაბ შარიქაძე: „ძალიან წარმატებული ტურნე გამოვიდა, შემიძლია ვთქვა რომ ისტორიულიც. არ ვიცი ვინ რას მოელოდა ჩვენგან და ვის როგორ სჯეროდა, მაგრამ ჩვენ ჩვენი თავის გვჯეროდა და სწორედ ამით შევძელით მოგება. რაც შეეხება მეთერთმეტე პოზიციას, ყველაზე რთული ისაა, რომ ამას შენარჩუნება უნდა, არაფერი არ დასრულებულა და სამუშაო ძალიან ბევრი გვაქვს“.

ნინუცა კაპანაძე