საქართველოს მორაგბეთა ნაკრებები თითქმის ერთთვიანი წარმატებული ტურნეების შემდეგ, შინ 27 ივნისს ბრუნდებიან და სადაც სამართალია, გულშემატკივრისგან საკადრის დახვედრას იმსახურებენ.

„უმცროსმა ბორჯღალოსნებმა“ პირველად ითამაშეს 20-წლამდელთა მსოფლიო ჩემპიონატზე და ელიტურ ათეულში დამკვიდრდნენ. ახალ ზელანდიასთან სადებიუტო მატჩში განცდილი მწარე მარცხის შემდეგ, ილია მაისურაძის შეგირდებმა უელსს დიდი ომი გაუმართეს და მსაჯს ბოლო წუთებზე ორი ეპიზოდი რომ არ „გამორჩენოდა“, ეგებ გამარჯვების ჯარიმაც გასულიყო, ასე კი 9:10 და საქართველოს ნაკრებმა მსოფლიოზე პირველი ქულა აიღო.

ირლანდიასთან გუნდი მე-8 წუთზე კაცნაკლული დარჩა, როგორც შემდგომში „მსოფლიო რაგბის“ სადისციპლინო კომიტეტმა აღიარა, ილია სპანდერაშვილი წითელ ბარათს არ იმსახურებდა. მიუხედავად კაცნაკლულობისა, ქართველებმა გმირულად ითამაშეს დაცვაში და მომავალმა ფინალისტმა მხოლოდ უკანასკნელ წუთზე შეძლო მეოთხე, პრემიალური ლელოს დადება - 7:35.

პლეი ოფში, უმნიშვნელოვანეს მატჩში საქართველოს ნაკრებმა იტალია ლამაზ სტილში, 18:17 დაამარცხა. სულ ბოლოს იყო საფრანგეთი, კვლავ ბოლომდე ბრძოლა და მცირედით მარცხი - 24:27.

ეს შედეგი გმირობის ტოლფასია და მსურველებს შეუძლიათ „უმცროს ბორჯღალოსნებს“ ღირსეული დახვედრა მოუწყონ. გუნდი თბილისში 27 ივნისს გამთენიისას, 04:55 საათზე ჩამოდის რეისით TK386. დროის გათვალისწინებით, თბილისის მერიამ გულშემატკივართა სურვილი გაითვალისწინა და სასტუმრო „რედისონთან“ 03:30 საათიდან 04:00 საათამდე ორი ავტობუსი დადგება, რომელიც გულშემატკივრის აეროპორტამდე და უკან მგზავრობას უზრუნველყოფს. ეს ლევან ჯობავას აქტივობის და თბილისის მერიის კეთილი ნების შედეგია. შეგახსენებთ, რომ ჯობავას ინიციატივით თამაშების პარალელურად ორ საზოგადოებრივი აქცია მოეწყო - „შენრასეტყვი“ და „1000მადლობა“.

მოკლედ, კარგი იქნება, თუ 20-წლამდელთა აეროპორტში დახვედრის მსურველები ლევან ჯობავას ფეისბუქ-გვერდს ეწვევით და წასვლის სურვილს ამ მისამართზე დააფიქსირებთ:

https://www.facebook.com/photo.php?fbid=1030564583694688&set=a.454426561308496.1073741825.100002234675626&type=3&theater&__mref=message_bubble

ეროვნული ნაკრები ისტირულ ტურნეზე წყნარი ოკეანის კუნძულებზე 2 ივნისს გაემგზავრა და თან გულშემატკივრის ნატვრა გაიყოლა - „ნეტა ერთი თამაში მაინც მოვიგოთ“. „ბორჯღალოსნებმა“ ეს ნატვრა 300%-იანი გადაჭარბებით აასრულეს და სამოასთან მოსაგები მატჩი ფრედ დაასრულეს - 19:19, ტონგა ბოლო წამებზე გმირული თამაშით და დავით კაჭარავას ლელოთი 23:20 დაამარცხეს, ხოლო წყნარი ოკეანის თასის მფლობელი ფიჯი უშანსოდ, 14:3 დასცეს.

გუნდის კაპიტანმა შალვა სუთიაშვილმა ტონგასთან მოგების შემდეგ განაცხადა, რომ ეს გამარჯვება და მომავალი თამაში იმ გულშემატკივარს ეძღვნებოდა, რომელიც ღამეს ტეხდა და ტელევიზორებთან ქომაგობდა ეროვნულ გუნდს. ახლა სწორედ ამ გულშემატკივარის ჯერია, რომ ნაკრებს თავდადებისთვის მადლობა გადაუხადოს და 27 ივნისი, საღამოს 20:05 საათზე „ბორჯღალოსნებს“ აეროპორტში დახვდეს!

ზურა ქსოვრელი