შოტლანდიის ნაკრებმა იაპონიას ტესტ-სერიის მეორე მატჩშიც მოუგო, რაც იმის მანიშნებელია, რომ ორშაბათს საქართველოს ნაკრები მსოფლიო რეიტინგში ისტორიულად ყველაზე მაღალ, მე-11 ადგილამდე აღზევდება.

ამისათვის საჭირო იყო „ბორჯღალოსნებს“ სუვაში ფიჯი დაემარცხებინათ, ხოლო ტოკიოში იაპონია დამარცხებულიყო. პარასკვეს ქართველებმა წყნარი ოკეანის ტურნეს დასკვნით შეხვედრაში ფიჯი 14:3 დასცეს, ხოლო დღეს შოტლანდიამ ძალების სრული მობილიზებით იაპონიას 21:16 აჯობა. საგულისხმოა, საქართველოს ფიჯისთან 15 და მეტი ქულის სხვაობით რომ ემარჯვა, ორშაბათს „ბორჯღალოსნებს“ კიდევ უფრო წინ, მე-10 პოზიციაზე ვიხილავდით.

იაპონია შესვენებაზე 4-ქულიანი უპირატესობით გავიდა და მერე ის 7-მდე გაზარდა, თუმცა დასკვნით ნახევარ საათში სქოთებმა მარწუხებს მოუჭირეს და სასურველი შედეგი დააფიქსირეს. სტუმრებმა ამჯერად ლელო ვერ დადეს და გამარჯვება სრულად ჰენრი პირგოსისა და გრეიგ ლეიდლოუს ფეხჩუბინობის შედეგია.

პირველ ტაიმში ორივე გუნდი ხელით თამაშისას ხშირად სცდებოდა, უპირატესობის მოპოვებას ფეხით ტაქტიკური დარტყმებით ცდილობდა და ბურთმაც დიდი დრო ჰაერში გაატარა. ანგარიში პირგოსმა გახსნა, მას ტამურამ უპასუხა, შოტლანდია მე-16 წუთზე კვლავ დაწინაურდა და ამჯერად იაპონიამ ლელოთი უპასუხა. მასპინძლებმა ხელდახელ საკუთარი ნახევრის სიღრმიდან შეუტიეს და რამდენიმე პასის შემდეგ ლელო კაიტო შიგენომ დაამიწა. ტამურამ გარდასახვის შემდეგ ერთი ჯარიმაც გაიტანა, ოღონდ მანამდე პირგოსმა ჩამორჩენა მინიმუმამდე დაიყვანა და ტაიმი 13:9 დასრულდა.

თამაშის განახლებიდან 9 წუთში ტამურამ თავისი მესამე ჯარიმა გაიტანა და ამჯერად მას ლეიდლოუმ უპასუხა, რომელიც თამაშში შესვენების შემდეგ ჩაერთო. მანვე საათის თავზე ჩამორჩენა მინიმუმამდე დაიყვანა და როგორც ხშირად ხდება ხოლმე, დასკვნითი მეოთხედი უფრო ძლიერმა გუნდმა მეტოქეზე უკეთ ჩაატარა. ლეიდლოუმ შოტლანდიას ლიდერობა 71-ე წუთზე დაუბრუნა, ხოლო საფინალო სასტვენამდე 3 წუთით ადრე შოტლანდიელთა უპირატესობა მეოთხე დარტყმით გაამყარა - 21:16.

ზურა ქსოვრელი