იტალიის 20-წლამდელთა ნაკრებმა მანჩესტერში მიმდინარე მსოფლიო ჩემპიონატის დასკვნით დღეს იაპონიას 41:17 სძლია და მე-11 ადგილი დაიკავა, რაც იმას ნიშნავს, რომ ელიტურ 12-ეულში ადგილი შეინარჩუნა და გაისად საქართველოში ითამაშებს.

ფინალურ შეხვედრას თუ არ ჩავთვლით, დასკვნით სათამაშო დღეს ამ მატჩს ყველაზე დიდი პრაქტიკული მნიშვნელობა ქონდა. დამარცხებული, ანუ 2016 წლის მსოფლიო ჩემპიონატის ბოლოადგილოსანი, გაისად ელიტაში ადგილს სამოას უთმობდა და ამ დავაში იტალია იაპონიაზე ძლიერი აღმოჩნდა. აზიელებმა იბრძოლეს, ჯარიმითაც დაწინაურდნენ, თუმცა მე-20 წუთამდე ორი ლელო მიიღეს და 3:12 ჩამორჩნენ.

22-ე წუთზე იამამურამ ლელო გაიტანა და კანალმა გარდასახვით ჩამორჩენა 2 ქულამდე დაიყვანა, თუმცა შესვენებამდე იტალიამ ჯერ ჯარიმა გაიტანა, ხოლო ზედ შესვენების წინ ბრონძინიმ დუბლი მიითვალა - 20:10. თამაშის განახლებიდან 10 წუთში დუბლი უკვე მანფრედიმ შეასრულა და იტალია გამარჯვებას მიუახლოვა, ხოლო 57-ე წუთზე „აძურიმ“ მეხუთე ლელო დადო და მატჩის ბედი გადაწყვიტა - 34:10. დასკვნით 20 წუთში კიდევ ორი ლელო გავიდა, ჯერ დუბლი კიდევ ერთმა იტალიელმა მორაგბემ, ლიკატამ შეასრულა, ხოლო 75-ე წუთზე ტატაფუმ იაპონელთა მეორე ლელო დადო და იტალიამ 41:17 იმარჯვა.

ზურა ქსოვრელი