საქართველოს მორაგბეთა ეროვნულმა ნაკრებმა ისტორიული, პირველი ტურნე წყნარი ოკეანის კუნძულებზე დაუმარცხებლად ჩაამთავრა. სამოასთან მოსაგები, მაგრამ ფრედ დამთავრებული მატჩის შემდეგ (19:19), „ბორჯღალოსნებმა“ ტონგას ბოლო წუთზე დადებული ლელოთი 23:20 აჯობეს, ბოლოს კი, 2016 წლის წყნარი ოკეანის თასის გამარჯვებულ ფიჯის 11-ქულიანი სხვაობით, 14:3 მოუგეს.

უნდა ვაღიარო - ტურნეზე გამგზავრების წინ ძნელად თუ ვიფიქრებდი მისი დასრულებისას ასეთი შედეგი თუ დადგებოდა. მგონი ამას არც არავინ ელოდა, რადგან გულშემატკივართა შეფასებისას უმეტესად ასეთ ფრაზას ვაწყდებოდი - ნეტა ერთი თამაში მაინც მოგვაგებინა. სხვაზე აბა რა ვთქვა და პირადად მე ბოდიშს ვიხდი „ბორჯღალოსნების“ წინაშე, რადგან მეც ამ „ნეტა ერთი თამაში მაინცს“ შორის ვიყავი და როგორც ჩანს, ბოლომდე კიდევ ვერ ვაფასებდი მილტონ ჰეიგის და მისი შეგირდების შესაძლებლობებს.

ადრეც არაერთხელ გვითქვამს, რომ ეს იყო უმნიშვნელოვანესი ტურნე, რადგან კეთილისმსურველებიც და მოწინააღმდეგეებიც დიდი ყურადღებით დააკვირდებოდნენ ქართველთა შედეგებს. სავარაუდოდ, ამ შედეგზე მნიშვნელოვნად უნდა იყოს დამოკიდებული ქართული რაგბის მომავალი, ვგულისხმობ ჩვენი ეროვნული გუნდის უფრო მაღალი დონის ტურნირში ჩართვის შესაძლებლობას და ამ ბიჭებმა დაამტკიცეს, რომ საქართველო ამას იმსახურებს! მათ გარჯას რა თქმა უნდა ზურგი გაუმაგრეს „უმცროსმა ბორჯღალოსნებმა“, რომლებმაც ელიტურ 10-ეულში შეაბიჯეს და შორს არ უნდა იყოს დღე, როდესაც მთელი ქართველი ერი ექვს ერში მიწვევას იზეიმებს.

ოკეანეთის ტურნეზე წარმატებული გამოსვლის შედეგად, საქართველოს ნაკრებმა დაამყარა რეკორდი და თუ აქამდე წაუგებელი მატჩების სერია შვიდს შეადგენდა, ახლა ის 9-მდე გაიზარდა - მოგება ნამიბიასთან 2015 წლის მსოფლიო თასზე, ხუთი გამარჯვება ევროპის ჩემპიონატზე, ფრე მოსაგებ თამაშში სამოასთან და მიყოლებით დამარცხებული ტონგასა და ფიჯის ნაკრებები. ბოლო სამი ის გუნდებია, რომლებსაც დამარცხებული ჰყავთ ავსტრალიის, უელსის, საფრანგეთის, შოტლანდიის და იტალიის ნაკრებები და მათ ძალასთან ერთად, კლიმატური პირობების გათვალისწინებით, ბევრი გუნდი ვერ დაიკვეხნის კუნძულების დაუმარცხებლად დალაშქვრას.

შესაძლოა, ვინმემ, ვისაც ქართული რაგბის წარმატება რბილად რომ ვთქვათ გულზე არ ეხატება, ან უბრალოდ ზედმეტად კრიტიკულადაა განწყობილი, წამოწიოს მოსაზრება, რომ მეტოქეები უძლიერესი შემადგენლობით არ დაგვიხვდნენ და დიახ ეს მართლაც ასეა. მაგრამ საპირწონედ მომენტალურად მახსენდება ჩვენი ლიდერები, რომლებიც საფრანგეთის ჩემპიონობისთვის იბრძოდნენ და ჯერ კიდევ იბრძვიან, მინიმუმ ექვსი ლიდერი, რომლებთან ერთადაც საქართველოს ნაკრები კიდევ უფრო სხვა ძალაა, ასევე, ის ახალგაზრდა მორაგბეები, რომლებიც ქვეყნის ღირსებას მანჩესტერში, 20-წლამდელთა მსოფლიოს ჩემპიონატზე იცავენ და რომ არა დროში დამთხვევა, მათი ნაწილი ახლა კუნძულებზე აუცილებლად იქნებოდა.

და კიდევ ერთი - ფიჯი, ტონგა და სამოა, საქართველოსთან ტესტ-მატჩების პარალელურად, თამაშობდნენ წყნარი ოკეანის თასზე, რომელიც ორი წლის ჯამში 2019 წლის მსოფლიო თასის შესარჩევი ეტაპია და არა მგონია მათ იაპონიის საგზური ექსპერიმენტების გამო სასწორზე დაედოთ. დიდი ალბათობით, ჩვენ დავამარცხეთ ის ნაკრებები, რომლებიც ამ სამეულის სამომავლო ბირთვს წარმოადგენენ და რომელთან მაქსიმალურად მიახლოვებული შემადგენლობით მომავალ მსოფლიო თასზე გეგმავენ წარდგენას.

ტესტ-სერიის და უშუალოდ ფიჯისთან მატჩის შედეგი საქართველოს ნაკრების თავდადებულმა და კარგად ორგანიზებულმა დაცვამ, დისციპლინამ, შერკინებამ და ტაქტიკურად ჭკვინურმა თამაშმა განაპირობა. ამ მოგებაში უდიდესი წვლილი მიუძღვის მილტონ ჰეიგს, მთელს სამწვრთნელო თუ სამედიცინო შტაბს, რა თქმა უნდა უშუალოდ იმ ბიჭებს, რომლებმაც მოედანზე ოფლი ღვარეს და სამშობლოს სიყვარულს. ჩემი აზრით, საქართველოს მორაგბეთა ნაკრების ერთ-ერთი მთავარი კოზირი და გამორჩეულობა, სწორედ სამშობლოს და ერთმანეთის სიყვარულია, ესაა ყველაზე შეკრული გუნდი მთელს დედამიწაზე და სწორედ ეს ერთსულოვნება გამოარჩევს „ბორჯღალოსნებს“ სხვა დანარჩენისგან.

ფიჯისთან მატჩი ყველა მორაგბემ კარგად ჩაატარა, კარგები იყვნენ გიორგი ბეგაძე და ლაშა ხმალაძე, რომლებიც თამაშს ჭკვიანურად და სწორად მართავდნენ. მიუხედავად არაერთი კრიტიკისა, ბეგაძემ ამ ტურნეზე დაამტკიცა, რომ დამსახურებულად ატარებს „ბორჯღალოსნების“ კვართს. გვქონდა სწრაფი ბურთი და შეტევების სწორი მიმართულებები, ხოლო ხმალაძემ, გარდა იმისა, რომ ლელო გაიტანა, სწორი ტაქტიკური დარტყმებით ყველა ჯერზე მონახა ცარიელი სივრცე. დავით კაჭარავამ და მერაბ კვირიკაშვილმა 95-ედ მოირგეს საქართველოს ნაკრების კვართი და ამ უკანასკნელმა საკუთარი მონაგარი კიდევ 9 ქულით, 743-მდე გაზარდა; მათზე ერთით ნაკლები კეპი აქვს ვეტერან გიორგი ჩხაიძეს, რომელმაც „მფრინავ ფიჯელებს“ პრაქტიკულად ყველა საჰაერო ბრძოლა მოუგო, ეროვნულ გუნდში ჩატარებული მატჩები 60-მდე დაამრგვალა გუნდის კაპიტანმა შალვა სუთიაშვილმა, რომელიც აგერ უკვე მე-15-ედ ჭკვიანურად წარუძღვა გუნდს, ხოლო ლაშა მალაღურაძემ 70-ე კეპი მოიხვეჭა.

საქართველოს ნაკრები ფიჯისთან მატჩში ფლობდა ტერიტორიულ უპირატესობას, აკონტროლებდა ბურთს და შეტევებით გამორჩეულმა მეტოქემ პირველად მხოლოდ ნახევარი საათის შემდეგ შეძლო ბურთიანად ჩვენს 22-ში შემოსვლა. მთლიანობაში, კუნძულელებმა სულ 2-3-ჯერ შეძლეს სახიფათოდ შეტევა, მაგრამ ქართველებმა ყველა მათი მცდელობა უკუაგდეს, თავად კი, ბევრად მეტი სალელოვე შანსი ჰქონდათ და მეტი სხვაობითაც შეიძლებოდა მეტოქის დამარცხება, თუმცა ესეც სავსებით საკმარისია.

წინასწარ გამოცხადებულ შემადგენლობაში ერთი ცვლილება იყო და თამაში სანდრო თოდუას ნაცვლად თამაზ მჭედლიძემ დაიწყო. შეხვედრა საქართველოს ნაკრებმა მშვიდად დაიწყო და დებიუტშივე შექმნა ხიფათი, როდესაც ხმალაძემ დაუცველ ზონაში ფეხით გადაკიდა ბურთი, მეტოქე იქვე ჩავხურეთ, შეცდომა დავაშვებინეთ, შერკინებაში ჯარიმა მოვიპოვეთ და კვირიკაშვილმა ანგარიში გახსნა. სამწუხაროდ, ფიჯიმ ჯარიმა მატჩის განახლებისთანავე დაგვიბრუნა და ანგარიში გაათანაბრა. კვირიკაშვილს მე-15 წუთზე მეორე შანსი მიეცა, მაგრამ ხელსაყრელი პოზიციიდან დარტყმა გაუცუდდა. სამაგიეროდ, მეტოქეს 20 წუთში ორჯერ მოვუგეთ მათივე აუტი და კუნძულელების ნახევარზე დავმკვიდრდით.

მერე იყო ჩვენი 5-მეტრა დერეფანი და მოკლეზე ჯაბა ბრეგვაძის შეტევა, იერიშის საპირისპირო ფლანგზე გაშლა და მჭედლიძის ლელო, რომელიც რეფერიმ წინპასის გამო გააუქმა. თაზოს რამდენიმე წუთში მაინც შეეძლო ლელოს დადება, როდესაც ხმალაძის ფეხით თამაშის შემდეგ ბურთთან პირველი იყო, თუმცა უკვე ლელოში შესულმა ოვალი ვერ დაიმორჩილა. ტაიმის დასკვნითი წუთები მასპინძლების იყო და ამჯერად მათი ლელო გაუქმდა წინპასის გამო. შესვენებამდე კარლენ ასიეშვილმა იარა კარგად, მას მხარი კაჭარავამ და მერაბ შარიქაძემ აუბეს, ცენტრიდაბ ბურთი 22-მდე ავწიეთ, მაგრამ იქ დავკარგეთ, კონტრშეტევას გადავრჩით და ტაიმი 3:3 დასრულდა.

მსაჯმა განახლებისა რომ ჩასტვინა ასიეშვილმა კვლავ კარგად შეუტია, ბეგაძემ იერიში სწრაფად გაშალა მარცხენა ფრთაზე, ხმალაძემ სივრცით ისარგებლა, მბოჭავს დაუსხლტა, მერე ორი მცველი ზედ ხაზთა დაეჭიდა, თუმცა ლაშამ დამიწება მაინც მოახერხა. კვრიკაშვილმა ვერ გარდასახა - 3:8. ამჯერად მეტოქეს სწრაფი პასუხი არ გამოუვიდა, საქართველოს ნაკრებმა ლელო დაიცვა და 5-მეტრიანი ზონიდან კონტრშეტევით თამაში კვლავ ფიჯის ნახევარზე დააბრუნა. ამას მოჰყვა თანმიმდევრული შეტევა, ბურთი კარგად ვაკონტროლეთ, ფიჯი დაჯარიმდა და ამჯერად კვირიკაშვილი აღარ შეცდა - 3:11.

მნიშვნელოვანი იყო, დასკვნითი მეოთხედის წინ, როდესაც თამაში ყველაზე მეტად გაჭირდებოდა, სოლიდური უპირატესობის შექმნა და შერკინების შემდეგ ბეგაძემ მეტოქეს ხაზი გაუჭრა, ბურთი ფეხით შეაცურა, თუმცა ხმალაძეს მცველებმა დაასწრეს. ფეხით თამაში და მასპინძლების მათსავე ნახევარზე შევიწროვება შემდეგ ეპიზოდებშიც გამოგვივიდა, ბოლოსკენ გონევამ შემოგვიტია სახიფათოდ, ჯარიმა ფიჯიმ სწრაფად გაათამაშა, თუმცა რაქში კაჭარავა შეუდარებელი იყო და ეს შეტევაც მოვიგერიეთ. ჯარიმას მოლი მოჰყვა, მასპინძლები დაჯარიმდნენ და კვირიკაშვილმა 40 მეტრიდან ჯარიმა ვერ გაიტანა, მაგრამ აგრესიულ დაცვით ფიჯელებს კვლავ დავაშვებინეთ შეცდომა, შერკინებამ ამჯერადაც დიდებულად იმუშავა და კვირიკაშვილმა 25 მეტრიდან გაიტანა.

ფიჯი გატყდა. გუნდი, რომელმაც წყნარი ოკეანის თასზე ტონგასა და სამოას დასკვნით მეოთხედში მოუგო, ამჯერად ვერაფერს გახდა, საქართველოს ნაკრებმა ის მისსავე კუნძულზე 14:3 დაამარცხა და შინ დაუმარცხებელი ბრუნდება. ახლა ჯერი ქომაგზეა, ამ ბიჭებს 1000 მადლობა და ღირსეული დახვედრა დაიმსახურეს - რაგბი ჩვენი თამაშია!

ფიჯი. სუვა. ეი ზე ემ პარკი

ფიჯი - საქართველო 3:14 (3:3)

ფიჯი: 15. ბენიტო მასილევუ, 14. სავენაკა რავაკა, 13. ადრიუ დელაი (23. ვერენიკი გონევა 59), 12. ერონი ვასიტერი (22. სერემაია ბაი 58), 11. პატრიკ ოსბორნი, 10. ბენ ვოლავოლა, 9. ნემანია კენატალე (21. ჰენრი სენილოლი 80+4), 8. ერემასი რადროდრო (20. მალაკაი რავულო 58), 7. მოსესე ვოკა, 6. ნაულია ნდავაი, 5. ტევიტა კავუბატი, 4. სავენაკა ტაბაკანალაგი (19. ნემია სოქეტა 41), 3. ტანიელა კოროი (18. მესაკე დოგე 55), 2. სუნია კოტო (16. ვილიამ ვეიკოსო 70), 1. პენი რავაი (17. კამპესე მააფუ 62).

1 ჯარიმა: ვოლავოლა

საქართველო: 15. მერაბ კვირიკაშვილი, 14. გიორგი ფრუიძე, 13. დავით კაჭარავა, 12. მერაბ შარიქაძე, 11. სანდრო თოდუა, 10. ლაშა ხმალაძე (22. ლაშა მალაღურაძე 70), 9. გიორგი ბეგაძე; 1. კარლენ ასიეშვილი (17. ზურაბ ჟვანია 58), 2. ჯაბა ბრეგვაძე (16. შალვა მამუკაშვილი 59), 3. ირაკლი მირცხულავა (18. ნიკოლოზ ხატიაშვილი 70), 4. გიორგი ჩხაიძე (19. ნოდარ ჭეიშვილი 75), 5. გიორგი ნემსაძე, 6. შალვა სუთიაშვილი (20. ლაშა ლომიძე 50), 7. გიორგი თხილაიშვილი (23. საბა შუბითიძე 64), 8. ბექა ბიწაძე.

1 ლელო: ხმალაძე

3 ჯარიმა: კვირიკაშვილი

ზურა ქსოვრელი