ერთწლიანი შესვენების შემდეგ „ტულონი“ საფრანგეთის პირველი ელიტარული დივიზიონის, ტოპ 14-ის ფინალში დაბრუნდა და 24 ივნისს ბარსელონაში, „კამპ ნოუზე“ „რასინგის“ წინააღმდეგ ითამაშებს.

ნახევარფინალურ შეხვედრას რენმა უმასპინძლა და მამუკა გორგოძის, კოტე მიქაუტაძისა და ლევან ჩილაჩავას „ტულონმა“ მიხეილ ნარიაშვილისა და დუდუ ქუბრიაშვილის „მონპელიე“ 27:18 დაამარცხა. საამაყოა, რომ მატჩში მონაწილეობა ხუთივე ქართველმა მიიღო. ცნობისათვის, ფრანგების გარდა მოედანზე ყველაზე მეტი, ექვსი მორაგბე სამხრეთ აფრიკიდან იყო, ხოლო ავსტრალიას და საქართველოს ხუთ-ხუთი წარმომადგენელი ყავდათ.

ხუთი ქართველიდან ოთხმა თამაში სასტარტო შემადგენლობაში დაიწყო - გორგოძემ სრულად ითამაშა, 10 შეტევით ჯამში 13 მეტრით წაიწია წინ, 4 პასი გააკეთა, ერთხელ მცველს გასცდა და ერთხელ ოფლოუდი გაახერხა, ერთხელ მეტოქის დერეფანი მოიგო, ხოლო დაცვაში 7 ბოჭვა შეასრულა. ტოლონელთა პირველი ლელოს დროს მამუკამ ბოლოსწინა პასი გააკეთა; მიქაუტაძემ 58 წუთი ითამაშა, 6 შეტევით 21 მეტრი იარა, ორჯერ მცველს გასცდა, ერთი ოფლოუდი გაახერხა და სამჯერ პასი გააკეთა, მის ანგარიშზე 2 ბოჭვაა; ჩილაჩავამ 64 წუთში 3-ჯერ შეუტია და ჯამში 8 მეტრი იარა, ხოლო დაცვაში ერთი ბოჭვა შეასრულა. მისი სტატისტიკა მოკრძალებულია, თუმცა დიდი შავი სამუშაო გაწია; შერკინებებში ჩილაჩავას პირისპირ ნარიაშვილი იდგა, რომელმაც მოედანზე 67 წუთი გაატარა, ბურთი 4-ჯერ მიიღო და 3 მეტრით წინ წაწია, დაცვაში 4 ბოჭვა შეასრულა და ორჯერ დაჯარიმდა; თამაშში 50-ე წუთიდან ჩაერთო ქუბრიაშვილი და „მონპელიეს“ დიდი ძალა შემატა. 3 შეტევით მან 4 მეტრი იარა, კარგად იდგა შერკინებაში და მეტოქე რამდენჯერმე დააჯარიმა.

მთლიანობაში, „ტულონმა“ უკეთესი შეხვედრა ჩაატარა და გამარჯვებაც დაიმსახურა. ის ფლობდა ტერიტორიულ უპირატესობას და აკონტროლებდა ბურთს. ორივე გუნდმა ორ-ორი ლელო დადო, ოღონდ ლეიგ ჰალფპენიმ გუნდს დამატებით კიდევ 17 ქულა შესძინა, კატრაკილისმა მხოლოდ 8 და ეს გადამწყვეტი აღმოჩნდა. პირველ მეოთხედში ტულონელები 3 ქულით სამჯერ დაწინაურდნენ, „მონპელიემ“ ორ შემთხვევაში საპასუხო ჯარიმის გატანა მოახერხა. 31-ე წუთზე სტეფონ ერმიტეჟმა ცენტრალური ხაზის სიახლოვეს წარმოქმნილი რაქიდან მოულოდნელად შეუტია და ბურთი ჯონათან პელისეს გაატანა, ის 22-ში შევიდა და ერმიტეჟს დაუბრუნა, რომელიც 5-მეტრიანთან შეაჩერეს, ორმხრივი შეცდომის შემდეგ ბურთი სწრაფად გაიშალა მარჯვნივ, გორგოძემ მაა ნონუს უპასა, მან ტუისოვას და ალამთან შეხვედრის პირველი ლელო გავიდა.

ტაიმის 14:6 მოგების შემდეგ, „ტულონმა“ მეორე ტაიმი კიდევ უფრო უკეთ დაიწყო და კარგი, თანმიმდევრული შეტევის შემდეგ, რომელშიც ქართველებიც აქტიურად იყვნენ ჩართული, მეორე ლელო გავიდა. დასკვნით ფაზაში ჰალფპენიმ გაჭრა ხაზი, ნონუს ოფლოუდი ამოუგდო, ზელანდიელმა დარჩენილი მანძილი ბრძოლით დაფარა და ჰალფპენიმ ზუსტად გარდასახა. მერე უელსელმა ჯარიმაც გაიტანა და ანგარიში 24:6 გახდა.

ზევით ვთქვით, რომ „ტულონმა“ მოგება დაიმსახურა, „მონპელიე“ კი, ბოლომდე ბრძოლისთვის ქებას იმსახურებს. 58-ე წუთამდე, 4-წუთიან ინტერვალში მოგმა ორი ლელო დადო, ერთი გარდასახვა ზუსტი იყო და დასკვნითი მეოთხედის წინ სხვაობა 6 ქულამდე დავიდა - 24:18. ჰალფპენიმ 63-ე წუთზე გატანილი ჯარიმით უპირატესობა გაზარდა. ერთ წუთში „მონპელიეს“ ზელანდიელი შუამარბი ტუიტავაკე ნონუს შეასკდა და გონება დააკარგვინა. ენტონიმ ეს ამბავი ძლიერ განიცადა, ნონუ გადარჩა, ოღონდ, სავარაუდოდ ტვინის შერყევის გამო ფინალს გამოტოვებს, განვლილ შეხვედრაში კი, ანგარიში აღარ შეცვლილა და „ტულონი“ ფინალში „რასინგს“ შეხვდება.

ზურა ქსოვრელი