იაპონიის ნაკრების ახალი მთავარი მწვრთნელის, ჯეიმი ჯოზეფის დებიუტი 12 ნოემბერს თბილისში, საქართველოს ნაკრებთან მატჩში შედგება.

ახალზელანდიელი სპეციალისტი „საკურების“ თავკაცად უკვე ოფიციალურად არის დადგენილი, თუმცა იგი ამჟამად სუპერ რაგბის კლუბ „ჰაილენდერსს“ უდგას სათავეში და ტურნირის დასრულების შემდეგ იაპონიის ნაკრებზე დაიწყებს ზრუნვას. მანამდე კი, იაპონელებს „სანვულვზის“ მთავარი მწვრთნელი მარკ ჰამეტი და რიუჯი ნაკატაკე თავკაცობენ.

თბილისური მატჩის შემდეგ იაპონელები კიდევ ორ ტესტ-მატჩს გამართავენ - 19 ნოემბერს სტუმრად უელსთან და 26 ნოემბერს ნეიტრალურ მოედანზე ფიჯისთან. რაც შეეხება „ბორჯღალოსნებს“, ისინი იაპონიის შემდეგ 18 ნოემბერს თბილისში სამოას დახვდებიან, ხოლო 26-ში შოტლანდიელებს გასვლაზე შეებმებიან.

უჩა გოგიძე