ჩახვიდე შორეულ სამოაში არასრული შემადგენლობით და ტოლსწორად ეთამაშო გუნდს, რომლისთვისაც უელსის და იტალიის დამარცხება ჩვეულებრივი მოვლენაა და ავსტრალიის ნაკრებიც კი ჰყავს დამარცხებული, გამარჯვების ტოლფასია.

დიახ, სამოა არ დაგვიხვდა საუკეთესი შემადგენლობით და გვეთამაშა განახლებული გუნდით, მაგრამ „ბორჯღალოსნებმაც“ მოისაკლისეს ლიდერები. ტოპ 14-ის მოწინავე კლუბებში მოთამაშეთა გარდა, მეორე ნაწილი კუნძულზე თამაშამდე რამდენიმე დღით ადრე ჩავიდა, არ გაუვლია გუნდთან ერთად მოსამზადებელი პერიოდი და ფაქტობრივად, ვერ მოასწრო აკლიმატიზაცია, ეს კი, ამ შედეგს კიდევ უფრო ფასეულს ხდის. 19:19 გამარჯვება არაა, თუმცა უკვე თამამად შეიძლება ითქვას, ამ შედეგით საქართველოს ნაკრებმა მოპოვებული პატივისცემა განიმტკიცა და „მსოფლიო რაგბის“ დაანახა, რომ მისთვის ნაადრევი სულაც არაა ძლიერი ტესტ-მატჩების დაგეგმვა და არსებულზე მაღალ დონეზე გაყვანა.

როგორც მოსალოდნელი იყო, „ბორჯღალოსნებმა“ მეტოქე დაჯაბნეს შერკინებაში და რაც სასიხარულოა, არაფრით ჩამორჩა ღია თამაშში. მილტონ ჰეიგის შეგირდები ფლობდნენ ინიციატივას, თამაშობდნენ თავდაჯერებულად, კარგად იდგნენ დაცვაში და რიგ ეპიზოდში მასპინძლები სისწრაფესა და ხელდახელ ბურთაობაში დაჩაგრეს, სულ ბოლოს კი, მატჩის მოგებაც შეეძლოთ, მაგრამ ლაშა მალაღურაძეს ჯარიმა, ხოლო ლაშა ხმალაძეს არეკნი არ წაუვიდა და მასპინძელ სამოას ფრე აკმარა, რაც კიდევ ერთხელ ვიტყვი, ჩემი აზრით, ძალიან დიდი შედეგია.

ყველაზე კარგად საქართველოს ნაკრებმა პირველი მეოთხედი ჩაატარა, ანუ ის პერიოდი, როდესაც სუნთქვა ნაკლებად ჭირდა. სამოა სისწრაფის ხარჯზე დებიუტშივე შეეცადა უპირატესობის მოპოვებას, მაგრამ დაცვა ასწრებდა გადაწყობას და ხაზის დალაგებას, რის შემდეგაც მასპინძლებს სივრცეები აღარ რჩებოდათ. პარალელურად, შეძლებისთანავე ბურთი კარგად იშლებოდა და უკვე საქართველოს ნაკრები ახერხებდა სისწრაფის ხარჯზე უპირატესობის მოპოვებას.

კარგად ითამაშა ღერძმა - გიორგი ბეგაძემ და ლაშა ხმალაძემ. ისინი სწორად ირჩევდნენ შეტევის მიმართულებს და ბურთიც სწრაფად იშლებოდა, ხოლო ხმალაძე და მერაბ კვირიკაშვილი ფეხით ტაქტიკურ დარტყმებსაც კარგად ასრულებდნენ. ნორმალური იყო ხაზი ხელით თამაშისას და დაცვაში, მორკინალებმა კი, ღია თამაშშიც ისახელეს თავი, ოღონდ რამდენჯერმე რაქში მეტოქემ იმძლავრა თუმცა, ეს ასეთი დონის მეტოქის წინააღმდეგ თამაშისას ჩვეულებრივი მოვლენაა.

განსაკუთრებით აღნიშვნის ღირსია გიორგი თხილაიშვილი, რომელიც თებერვალში ესპანეთთან მატჩში დაშავდა და მას შემდეგ მოედანზე პირველად გავიდა. თითქოს სამი თვის წინ არაფერი მომხდარა და მთელი ეს პერიოდი უმაღლეს დონეზე თამაშობდა - აი ასეთი იყო თხილაიშვილი, რომელიც კუნძულელებს ნამდვილ რისხვად ექცა. სამი წლის წინ, სამოასთან თბილისურ მატჩში, მან დაბალი ბოჭვებით კუნძულელებს გასაქანი არ მისცა, შარშან მსოფლიო თასზე შავი დღე აყარა ტონგას და ლელოც დაუდო, ახლა კი, კვლავ სამოასთან, ჩვეულ სტილში ასრულა ბოჭვები და მართალია „ტონგას სტილში“ ლელო არ გამოუვიდა, მაგრამ მერე მეტოქის ჩათვლის მოედანს მოლიდან მიწვდა.

საწყის მეოთხედში კვირიკაშვილმა 45 და 35 მეტრიდან ორი ჯარიმა გაუტანა და საქართველო 6:0 დააწინაურა, მერე კი, მატჩში პირველი სალელოვე მომენტი შეიქმნა და ისიც სტუმრების ანგარიშზეა - 40-მეტრიან წყვეტილ ხაზთან დერეფნის მოგების შემდეგ მორკინალებმა ბურთი 22-მეტრიან ხაზამდე მიიტანეს, ხმალაძემ ის ფეხით შეაცურა და მერაბ შარიქაძე და დავით კაჭარავა მიყვნენ. მცველმა შემტევებს წამის მეასედით დაასწრო, თუმცა წნეხის ქვეშ გამოსავალი ვერ იპოვა და ოვალი საკუთარ ლელოში დაამიწა. მერე კვირიკაშვილმა და სანდრო თოდუამ წამოიწყეს კარგი კონტრშეტევა, მაგრამ გადაცემა ჩაიჭრა.

შერკინებამ კვირიკაშვილს 25-ე წუთისთვის ხელსაყრელ პოზიციაზე კიდევ ერთი ჯარიმა გამოუმუშავა, თუმცა ამჯერად დამრტყმელს მიზანმა უმტყუნა, ხოლო 30-ე წუთზე სამოამ პირველად და ერთადერთხელ პირველ ტაიმში, სახიფათოდ შეუტია - ტეოფილო პაულოს მიძალება ხმალაძემ შეაჩერა, ბურთი სწრაფად გავიდა რაქიდან და ჯეფ ლეპა იყო მიზანთან ახლოს, მაგრამ კონტაქტისას ლელოდან 5 მეტრში ბურთი წინ გადაუვარდა. ტაიმის ბოლოს სუნთქვა გაჭირდა, სათამაშო სქემა აირია და 32-ე წუთზე პატრიკ ფააპალემ თამაშგარისთვის დანიშნული ჯარიმა 3 ქულად აქცია. შესვენების წინ კვირიკაშვილმა რთული პოზიციიდან, დაახლოებით 45 მეტრიდან მეოთხე ცდიდან მესამე ჯარიმა გაიტანა და თითქოს ტაიმი ასე უნდა დასრულებულიყო, მაგრამ მატჩის განახლებისთანავე ჯარიმა მასპინძლებმაც გამოიმუშავეს და ჩამორჩენა კვლავ 3 ქულამდე დავიდა - 9:6.

მეორე ტაიმი დაიწყო თუ არა სამოამ შემოგვიტია და ფააპალემ 40 მეტრიდან წონასწორობა აღადგინა. განვაახლეთ ცენტრიდან თამაში და კიდევ ერთი სწრაფი შეტევა მივიღეთ, ზედიზედ ორი ბოჭვა რომ დაგვიანდა შემტევი ლელოდან ხუთიოდე მეტრში შევაჩერეთ, თითქოს დაცვამ დაბრუნება მოასწრო, მაგრამ დავიდ ლემის გაუმართლა, მისი ფეხით შეცურებული ბურთი იმდენად ძლიერი იყო, სავარაუდოდ ლელოს გაცდებოდა, თუმცა ძელმა აისხლიტა და სამოელთა კაპიტანმაც ძელებსშუა დაამიწა, რის შემდეგაც გარდასახვაც ზუსტი იყო - 9:16 45-ე წუთზე.

აქ გაჩნდა საფრთხე, რომ ფსიქოლოგიური მომენტი, კლუმატური პირობები, გულშემატკივარის ფაქტორი და დაღლილობა იჩენდა თავს, მაგრამ საქართველოს ნაკრების თითოეული მოთამაშის სასახელოდ უნდა ითქვას, ისინი არ გატყდნენ და მეტოქეს სწრაფი პასუხით ფსიქოლოგიური დარტყმა იქით მიაყენეს. კარგი სალელოვე შეტევა მეტოქემ ჯარიმის ხარჯზე შეაჩერა, გუნდის კაპიტანმა შალვა სუთიაშვილმა სწორი გადაწყვეტილება მიიღო და ჩამორჩენის 3 ქულით შემცირების ნაცვლად, 22 მეტრიდან ბურთის აუტში გადატანა ირჩია, დერეფნის მოგების შემდეგ თხილაიშვილმა მოკლე ფრთაზე შეუტია და დამუშავებული კომბინაციით შიგნით ირაკლი მირცხულავა შეიყვანა. მცველებმა მისი შეჩერება შეძლეს, მოკლე დარტყმებს კი ვეღარ გაუძლეს და დაჯარიმდნენ.

მორიგ დერეფანს მოლის დაყენება მოყვა, რომელმაც პირველივე დარტყმით მოარღვია სამოელთა დაცვა და ლელოს სიღრმეში თხილაიშვილმა დაამიწა, ხოლო კვირიკაშვილმა გარდასახვით ანგარიში გაათანაბრა. ამას ქართველთა შეცდომა მოყვა და სამოა 40 მეტრიდან გატანილი ჯარიმით 54-ე წუთზე ისევ დაწინაურდა, თუმცა დასკვნითი მეოთხედი კვლავ ქართველების იყო. შეცვლაზე შესულმა პირველმა ხაზმა მასპინძელთა შემცვლელები პირწმინდად დაჩაგრა და თუ მანამდე სამოა ხანდახან მაინც ახერხებდა ამ კომპონენტის სათავისოდ დასრულებას, ამჯერად „ბორჯღალოსანთა“ უპირატესობა თვალსაჩინო გახდა.

62-ე წუთზე შერკინებას ჯარიმა გასატან პოზიციაზე მოყვა და კვირიკაშვილმა წონასწორობა აღადგინა. რამდენიმე წუთში, კვლავ შერკინებით მოპოვებული ჯარიმის შემდეგ, 42 მეტრიდან ჯარიმა კარში აღარ დავარტყით და მერე დერეფანში ბურთი დავკარგეთ. და მაინც სათამაშო უპირატესობა ქართველთა მხარეს იყო და „ბორჯღალოსნების“ დაწინაურების შანსი ლაშა მალაღურაძეს ჰქონდა, თუმცა კარის წინ 48 მეტრიდან ჯარიმა ააცილა. დასკვნითმა წუთებმაც სტუმრების იერიშებში ჩაიარა, მეტოქემ შეძლო ქართველთა საკუთარი 22-იდან განდევნა და ხმალაძემ ბედი არეკნით სცადა, თუმცა მიზანმა მასაც უმტყუნა და ისტორიულად კუნძულელთა შორის უძლიერესი სამოა, საქართველოს ნაკრებთან მარცხს გადაურჩა.

19:19 - ასეთია ოკეანეთის ტურნეს პირველი მატჩის შედეგი და 18-ში ფიჯიზე, სუვაში, საქართველოს ნაკრებს ტონგასთან მატჩი ელის.

სამოა. აპია. ტესტ-მატჩი

სამოა - საქართველო 19:19 (6:9)

სამოა: 15. ალბერტ ნიკორო, 14. ფაატოინა აუტაგავაია (23. მალუ ფალანიკო 76), 13. რეინოლდ ლეე-ლო, 12. ფაიალაგა აფამასაგა, 11. დავიდ ლემი, 10. პატრიკ ფააპალე (22. დ’ანჯელო ლეუილა 80), 9. დუეინ პოლატაივაო (21. დენი ტუსიტალა 80+3); 1. სემ აიონო (17. ნუული ლენე 76), 2. მოტუ მატუუ (16. სეილალა ლემი 57), 3. ჯეიმს ჯონსტონი (18. ჯეკ გრეი 59-70), 4. ფაატიგა ლემალუ, 5. ტეოფილო პაულო (19. ტალაგა ალოფიპო 71), 6. ალაფოტი ფაოსილვა, 7. ტალა ჯეიმს იოანე (20. ონეონე ფააფოუ 66), 8. ჯეფ ლეპა.

1 ლელო: ლემი

1 გარდასახვა: ფააპალე

4 ჯარიმა: ფააპალე

საქართველო: 15. მერაბ კვირიკაშვილი (22. ლაშა მალაღურაძე 72), 14. გიორგი ფრუიძე (23. თამაზ მჭედლიძე 72), 13. დავით კაჭარავა, 12. მერაბ შარიქაძე, 11. სანდრო თოდუა, 10. ლაშა ხმალაძე, 9. გიორგი ბეგაძე (21. ვაჟა ხუციშვილი 59); 1. კარლენ ასიეშვილი (17. ზურაბ ჟვანია 51), 2. ჯაბა ბრეგვაძე (16. შალვა მამუკაშვილი 51), 3. ირაკლი მირცხულავა (18. ანტონ ფეიქრიშვილი 51), 4. გიორგი ჩხაიძე (19. ნოდარ ჭეიშვილი 71), 5. გიორგი ნემსაძე, 6. შალვა სუთიაშვილი (20. საბა შუბითიძე 71), 7. გიორგი თხილაიშვილი, 8. ლაშა ლომიძე.

1 ლელო: თხილაიშვილი

1 გარდასახვა: კვირიკაშვილი

4 ჯარიმა: კვირიკაშვილი

ზურა ქსოვრელი