საქართველოს ნაკრების შუამარბი მერაბ შარიქაძე ჯანმრთელადაა და 11 ივნისს აპიაში სამოას ნაკრების წინააღმდეგ თამაშს შეძლებს.

პრო დ2-ის ფინალში შარიქაძის „ორიაკი“ „ბეიონთან“ 16:21 დამარცხდა. იმ მატჩის დებიუტში 22 წლის ქართველს წარბი გაუსკდა, მოედანი დროებით დატოვა და ჭრილობის გაკერვის შემდეგ მოედანს დაუბრუნდა. „ბუკა“ მოედანზე 70-ე წუთამდე იყო.

დღეს ტოპ 14-ის დასკვნითი ტურია, რომელშიც ქართველი ლეგიონერებიც მიიღებენ მონაწილეობას. ამის შემდეგ ისინი, ასევე პრო დ2-ის ფინალისტი გუნდების ლეგიონერები, გეზს სამოასკენ აიღებენ. მგზავრობა გადაჯდომებით ორი დღეს გასტანს, კუნძულს 8 ივნისს ეწვევიან და შესაბამისად, 11-ში თამაშიც შეეძლებათ.

შეგახსენებთ, საქართველოსა და სამოას ტესტ-მატჩი 11 ივნისს, თბილისის დროით გამთენიის 6 საათზე დაიწყება და მის პირდაპირ ტელე-რეპორტაჟს საქართველოს საზოგადოებრივი მაუწყებელი გეგმავს. 2013 წლის ნოემბერში „ბორჯღალოსნებმა“ სამოა თბილისში, „მიხეილ მესხზე“ 16:15 დაამარცხეს და მაშინ გადამწყვეტი ლელო შარიქაძემ დადო.

ზურა ქსოვრელი