საქართველოს 20-წლამდე მორაგბეთა ნაკრები შუაღამისას ინგლისში, მანჩესტერში გაემგზავრა, სადაც ასაკობრივ მსოფლიოს ჩემპიონატზე ითამაშებს.

„უმცროსი ბორჯღალოსნები“ უკვე ადგილზე არიან და დღეს დაისვენებენ, ხვალიდან კი, მზადებას გააგრძელებენ.

საქართველოს ნაკრები პირველ მატჩს 7 ივნისს, მოქმედ ჩემპიონ ახალ ზელანდიასთან გამართავს, 11-ში 20-წლამდელთა ექვსი ერის „დიდი სლემით“ მომგებ უელსს შეხვდება, ხოლო 15-ში ირლანდიასთან ჯახით ჯგუფურ ეტაპს დაასრულებს და პლეი ოფში გადაერთვება.

20-წლამდელთა მსოფლიოს ჩემპიონატში 12 გუნდი მონაწილეობს და ისინი 4-4-გუნდა სამ ჯგუფში არიან გადანაწილებული. თითოეული ჯგუფის გამარჯვებული და ერთიც საუკეთესო მეორეადგილოსანი თასის ნახევარფინალში გადის; დანარჩენი ორი მეორეადგილოსანი და ორი უკეთესი მესამეადგილოსანი V-VIII ადგილებისთვის გააგრძელებენ ბრძოლას; ხოლო უარესი მესამეადგილოსანი და სამი ბოლოადგილოსანი IX-XII ადგილებს გაითამაშებენ.

მსოფლიოს ჩემპიონატზე ბოლო ადგილზე გასული გუნდი, გაისად „ალაფაზე“ დაქვეითდება, ოღონდ ეს არ ეხება საქართველოს, რადგან 2017 წელს 20-წლამდელთა მსოფლიოს ჩემპიონატს საქართველო მასპინძლობს. საქართველოს საზოგადოებრივი მაუწყებელი საქართველოს ნაკრების ხუთივე თამაშის, ასევე ფინალური შეხვედრის პირდაპირ ტელერეპორტაჟს შემოგვთავაზებს.

ზურა ქსოვრელი