მომავალი სეზონიდან საფრანგეთის პირველ ელიტარულ დივიზიონ ტოპ 14-ში ქართველი ლეგიონერების გუნდების რაოდენობა გაიზრდება.

მართალია უმაღლეს დივიზიონს „ოიონასთან“ ერთად თამაზ მჭედლიძისა და გიორგი თეთრაშვილის „აჟენი“ დაემშვიდობა, რომლის შემადგენლობაშიც მომავალ სეზონში ვახტანგ ახობაძეც ითამაშებს, მაგრამ ელიტა ერთში ქართველთა ორი გუნდი დაწინაურდება. ერთი დიდი ხანია ცნობილია - ზაზა ნავროზაშვილისა და გიორგი ჯავახიას „ლიონი“, რომელმაც პრო დ2 მოიგო, ხოლო მეორე 4 ივნისს გაირკვევა. ამ დღეს, გადამწყვეტ მატჩში ლევან დათუნაშვილის, მერაბ შარიქაძის, ნიკოლოზ ხატიაშვილისა და გიორგი შარაშიძის „ორიაკი“ ანტონ ფეიქრიშვილის „ბეიონს“ ეთამაშება.

უკვე ვწერდით, რომ „ორიაკმა“ „მონ-დე-მარსანი“ 28:13 დაამარცხა, დღეს კი, მეორე ნახევარფინალში „ბეიონმა“ „კოლომიეს“ 28:16 აჯობა. თავიდანვე გეტყვით, რომ საქართველოს ნაკრების ბურჯი ფეიქრიშვილი თადარიგში იყო და თამაშში 58-ე წუთიდან ჩაერთო.

ბასკებმა წარმატებას მეორე ტაიმში მიაღწიეს. პირველი ნახევარი გარდამავალი უპირატესობით წარიმართა. 23 წუთში მარტინ ბუსტოს მოიანომ სამი, ხოლო დავიდ სკრელამ ერთი ჯარიმა გაიტანა, მერე სკრელამ 3 წუთის ინტერვალით ჯარიმა და არეკნი შეასრულა და წონასწორობა აღადგინა, ხოლო 38-ე წუთზე „კოლომიეს“ ლელო კვლავ სკრელამ გარდასახა. გაწითლებულ დროზე მასპინძელთა არგენტინელმა ფულბეკმა მორიგი 3 ქულა მიითვალა და ტაიმი 12:16 დასრულდა.

მატჩის განახლებიდან 10 წუთში მოიანომ ჯარიმით სხვაობა მინიმუმამდე დაიყვანა, ხოლო 57-ე წუთზე „ბეიონმა“ თავისი ლელო დადო. თავი ზელანდიელმა გარემარბმა კადე პოკიმ გამოიჩინა და მოიანო კვლავ ზუსტი იყო. 65-ე და 76-ე წუთებზე მოიანომ კიდევ ორი ჯარიმა შეასრულა და ბასკების ფინალში გასვლაში უდიდესი როლი ითამაშა. გადამწყვეტი მატჩი ტულუზში გაიმართება. შეგახსენებთ, რომ რეგულარული გათამაშება „ბეიონმა“ მეორე, ხოლო „ორიაკმა“ მესამე ადგილზე დაასრულა.

ზურა ქსოვრელი