საფრანგეთის მეორე ელიტარულ დივიზიონ პრო დ2-ში რეგულარული გათამაშება დასრულდა და ის ოთხეული გაირკვა, რომლებიც ტოპ 14-ის საგზურისთვის იბრძოლებენ.

პრაქტიკულად, ოთხეულში ყველა იმ გუნდმა შეინარჩუნა ადგილი, რომლებმაც ეს პოზიციები ბოლო ტურებში მოიპოვეს. სასიამოვნოა, რომ ამ ოთხიდან სამი გუნდი ქართველი ლეგიონერებისაა და მინიმუმ ერთ-ერთი მათგანი ფინალში აუცილებლად ითამაშებს.

დასკვნითი, 30-ე ტურის ცენტრალურ მატჩად ანტონ ფეიქრიშვილისა „ბეიონისა“ და ბექა გორგაძის „მონ-დე-მარსანის“ დაპირისპირება იყო მიჩნეული. მასპინძლებს პლეი ოფი დაბევებული ჰქონდათ, სტუმრები მიზანთან ძალიან ახლოს იყვნენ და მათთვის პრემიალური ქულა სრულიად საკმარისი იყო, თუმცა, იყო სხვა დატვირთვაც - ვინ რომელი ადგილით გავიდოდა პლეი ოფში. თამაშმა უკომპრომისო ბრძოლაში ჩაიარა და მასპინძლებმა მეტოქის 10-მატჩიან წაუგებელი სერია შეწყვიტეს - 23:17.

„მონ-დე-მარსანის“ ადრეულ ლელოს მასპინძლებმა შესვენებამდე ორით უპასუხეს, გუნდებმა გარდასახვების გარდა თითო-თითო ჯარიმაც გაიტანეს და ტაიმი „ბეიონმა“ 17:10 მოიგო. არგენტინელმა მარტინ ბუსტოს მოიანომ ჯარიმით უპირატესობა 10 ქულამდე გაზარდა და 68-ე წუთზე ერთი ჯარიმაც გაიტანა, ოღონდ მანამდე სტუმრებმა ტონგელი ტუტაიას ლელოთი და ზელანდიელი მეთ ჯეიმსის გარდასახვით ჩამორჩენა 3 ქულამდე დაიყვანეს. მოკლედ, „ბეიონმა“ მეორე ადგილი შეინარჩუნა და მართალია „მონ-დე-მარსანმა“ პრემიალური ქულის აღება ვერ შეძლო, მაგრამ ვერც მდევრებმა იყოჩაღეს და მეოთხე ადგილზე დარჩა. მასპინძელთა შორის შეცვლაზე დასკვნითი 10 წუთი ითამაშა ფეიქრიშვილმა. 59-ე წუთიდან შეცვლაზე შევიდა სტუმართა ქართველი მესამეხაზელი გორგაძე.

ნახევარფინალში „მონ-დე-მარსანი“ ლევან დათუნაშვილის, მერაბ შარიქაძის, ნიკოლოზ ხატიაშვილისა და გიორგი შარაშიძის „ორიაკს“ შეხვდება, რომელმაც დასკვნით ტურში „ბიარიცს“ 24:16 მოუგო და მესამე ადგილი დაიბევა. შეუცვლელად ითამაშა შუამარბმა შარიქაძემ, ხოლო მეორეხაზელი დათუნაშვილი შეცვლაზე 53-ე წუთზე შევიდა. „ორიაკმა“ ტაიმი 13:6 მოიგო, მაგრამ თამაშის განახლებიდან 6 წუთში ანგარიში გათანაბრდა, ხოლო 56-ე წუთზე „ბიარიცი“ ჯარიმით დაწინაურდა. მასპინძლებმა ორი საპასუხო ჯარიმა 6 წუთში გაიტანეს, ხოლო შეხვედრის მიწურულს ლელო დადეს და ნახევარფინალისთვის გაემზადნენ.

„ბეიონის“ მეტოქე „კოლომიე“ იქნება. პლეი ოფში გასული ერთადერთი „არაქართული“ გუნდი, „კარკასონთან“ 20 წუთის შემდეგ 3:15 აგებდა. გერმანელმა კრისტოფერ ჰილსენბეკმა ჯარიმებით ჩამორჩენა 3 ქულამდე დაიყვანა - 12:15 44-ე წუთზე. ეს ანგარიში 70-ე წუთამდე შენარჩუნდა, მერე „კოლომიემ“ ჯარიმით წონასწორობა აღადგინა, 73-ე წუთზე ლელო დადო და მნიშვნელოვანი გამარჯვება მოიპოვა.

მოიგო ლაშა ლომიძის „ბეზიემაც“, მაგრამ „კოლომიეს“ გამარჯვების ფონზე, ამან ფასი დაკარგა. „ბეზიემ“ „მონტობანს“ სტუმრად 22:13 აჯობა, ქართველი მესამეხაზელი კი, მწვრთნელმა განაცხადში არ შეიყვანა.

პლეი ოფში გასვლის შანსი ჰქონდა, მაგრამ ერთ-ერთ აუტსაიდერთან, ელიზბარ ყუფარაძის „დაქსთან“ 7:20 დამარცხდა დიმიტრი ბასილაიასა და გიორგი მჭედლიშვილის „პერპინიენი“. მატჩში მონაწილეობა ორმა ქართველმა მიიღო და ორივე შეცვლაზე შევიდა - ყუფარაძე 50-ე, ხოლო მჭედლიშვილი 63-ე წუთზე. „პერპინიენი“ გასვლით თამაშებს სუსტად ატარებს და ასე მოხდა ამჯერადაც. ტაიმის 0:3 წაგების შემდეგ, 51-ე წუთზე სტუმრებმა ლელო გაიტანეს და გარდასახეს, მაგრამ მათი ლიდერობა მხოლოდ 4 წუთი გაგრძელდა და ლელო-გარდასახვა თავადაც გაუშვეს. დარჩენილ დროში „დაქსმა“ კიდევ ერთი ლელო დადო, გარდასახა და საბოლოო შედეგი ჯარიმით დააფიქსირა.

ზაზა ნავროზაშვილისა და გიორგი ჯავახიას „ლიონმა“, რომელმაც ტოპ 14-ის პირდაპირი საგზური დიდი ხნის წინ მოიპოვა, ბექა შეყლაშვილისა და ვახტანგ მაისურაძის „ალბი“ 34:17 დაამარცხა. სტუმრები 10:3 იგებდნენ, თუმცა ტაიმის მიწურულს, ორი წუთის ინტერვალში ორი ლელო გაუშვეს და 10:17 ჩამორჩნენ. ამას ისიც დაერთო, რომ შეყლაშვილი რეფერიმ პირდაპირ წითელი ბარათით გააძევა და კაცნაკლულმა „ალბიმ“ ვეღარ გაძლო. მეორე ნახევარში მათ მხოლოდ 1 ლელო გაიტანეს, თავად სამი მიიღეს და მეტოქეს პრემიაც დაუტოვეს. ნავროზაშვილმა, რომელიც მძიმე ტრავმის შემდეგ მოედანს გასულ ტურში დაუბრუნდა, შეცვლაზე 57-ე წუთიდან ითამაშა.

გიორგი ნემსაძის, ირაკლი მირცხულავასა და კახაბერ კობერიძის „ტარბი“ სტუმრად „ბურგუენთან“ 19:50 დამარცხდა. კობერიძე სასტარტო შემადგენლობაში იყო და მე-17 წუთზე შესაცვლელი შეიქმნა. მეორეხაზელმა ნემსაძემ სრულად ითამაშა, ოღონდ შერკინების შემკვრელის, 8 ნომრის პოზიციაზე და კონკრეტულად მისთვის ექსპერიმენტმა გაამართლა - მან 75-ე წუთზე ლელო გაიტანა. ეს ნემსაძის მეორე ლელოა მიმდინარე სეზონში და მას 8 ნომერზე სხვა დროსაც უთამაშია. მთლიანობაში, სტუმართა სამი ლელოს წილ მასპინძლებმა 7 გაიტანეს.

კარი გაიჯახუნა გიორგი ზაქაშვილის „ექსმა“, რომელმაც „ნარბონს“ 19:18 სძლია. ზაქაშვილი სასტარტო შემადგენლობაში იყო და ერთი საათი ითამაშა. „ნარბონის“ რიგებში დებიუტი ჰქონდა შაკო ოდიშარიას, რომელიც შეცვლაზე 66-ე წუთზე შევიდა.

პრო დ2-ის ამბები ამით არ დასრულებულა. საფრანგეთის რაგბის კავშირის სააპელაციო კომიტეტმა, „ტარბი“ ფედერალ 1-ში დააქვეითა და შედეგად, „დაქსი“ მომავალ სეზონს კვლავ ელიტა 2-ში დაიწყებს.

საფრანგეთი. პრო დ2. XXX (ბოლო) ტური. 22 მაისი

ლიონი - ალბი 34:17

ბურგუენი - ტარბი 50:19

ექსი - ნარბონი 19:18

დაქსი - პერპინიენი 20:7

ორიაკი - ბიარიცი 24:16

კარკასონი - კოლომიე 15:22

ბეიონი - მონ-დე-მარსანი 23:17

მონტობანი - ბეზიე 13:22

ტარბს დაკლებული აქვს 8 ქულა

ნახევარფინალები. 28-29 მაისი

ორიაკი - მონ-დე-მარსანი; ბეიონი - კოლომიე

ზურა ქსოვრელი