არგენტინის ეროვნული ნაკრებისა და სუპერ რაგბის „იაგუარესის“ შერკინების შემკვრელი ლეონარდო სენატორე 10-კვირიანი დისკვალიფიკაციით დასაჯეს.

32 წლის მორაგბემ 14 მაისს, „შარქსთან“ მატჩის მსვლელობისას მეტოქეს უკბინა. რეფერის ეს ეპიზოდი შეუმჩნეველი დარჩა, თუმცა სასჯელს ვერ გადაურჩა. სადისციპლინო კომისიამ განიხილა ვიდეო-ჩანაწერი სხვადასხვა რაკურსით, მოუსმინა მოთამაშეებს და ოფიციალურ პირებს, რის შემდეგაც არგენტინელს 12-კვირიანი სასჯელი გამოუწერეს. რადგან სენატორე კბენაში ადრეც იყო შემჩნეული, მისი სასჯელი კიდევ ორი კვირით დამძიმდა.

ამის შემდეგ დისციპლინარებმა გაითვალისწინეს შემამსუბუქებელი ფაქტორები, მოთამაშის ხასიათი და დამსახურებები, ის, რომ ლეონარდო ხშირად არ ხვდება დამრღვევთა სიაში და მისი სასჯელი 4 კვირით შეამსუბუქეს. ამრიგად, სენატორეს 10-კვირიანი დისკვალიფიკაციის მოხდა მოუწევს, რაც ორ თვეზე ოდნავ მეტია და ის ეროვნულ გუნდს ივნისის ტესტებზე ვერ დაეხმარება, ხოლო მოედანს ივლისის მიწურულს დაუბრუნდება.

„შარქსთან“ ბოლო წუთზე გაშვებული ჯარიმით 22:25 წაგებულ თამაშს შეეწირა „იაგუარესის“ კიდევ ერთი მორაგბე, კაპიტანი აგუსტინ კრევი. კვაჭს სახიფათო ბოჭვაში დასდეს ბრალი და ერთკვირიანი დისკვალიფიკაცია გამოუწერეს. ის გუნდს 21 მაისს, „ლაიონსის“ წინააღმდეგ გასამართ მატჩში ვერ დაეხმარება.

ზურა ქსოვრელი