ჭაბუკთა „ა“ ლიგის გუნდები საზაფხულო შესვენებაზე გავიდნენ, მანამდე კი, მეორე ეტაპის მე-5 ტურის თამაშები მოილიეს.

რუსთავში „ხარებმა“ ქუთაისის „აია 1“-ს დიდი წინააღმდეგობა გაუწია და გახდა პირველი გუნდი, რომელთანაც ქუთათურებმა პრემიალური ქულა ვერ აიღეს, მაგრამ ამით ვერც მასპინძლებმა იხეირეს. „აია 1“-მა მართალია ყველაზე მცირე სხვაობით იმარჯვა და სამით მეტი ლელო ვერ გაიტანა, მაგრამ გამარჯვებების სერია გააგრძელა და პირველობას ინარჩუნებს - 29:17.

ქუთაისელთა მხრიდან ქულის დაკარგვით ისარგებლა მეორე დაუმარცხებელმა გუნდმა თბილისის „ლელომ“ და მას ქულებით გაუტოლდა. „ლელო“ კიდევ ერთ დაუმარცხებელ „ლოკომოტივს“ შეხვდა და დამაჯერებლად, 38:16 იმარჯვა, თანაც პრემიალური ქულაც გაიფორმა.

მეორე ეტაპზე პირველი გამარჯვება ჩაიწერა „იუნკრი ჩოხოსნებმა“, რომელმაც ქუთაისი „ბაგრატს“ დაძაბულ ბრძოლაში 17:14 მოუგო. მოწინავე რვა გუნდს შორის ჯერჯერობით გამარჯვების გარეშეა „არმია“, რომელსაც „ჯიქმა“ 55:3 აჯობა და პრემიალური ქულაც ჩაიწერა.

ახლა გუნდები თითქმის ოთხთვიან შესვენებაზე გადიან და გათამაშებას 30-31 აგვისტოს გააგრძელებენ.

ზურა ქსოვრელი