საქართველოს ჩემპიონატის ჭაბუკთა „ა“ ლიგაში ქუთაისელი ახალგაზრდები გასაოცარი შედეგიანობის ჩვენებას განაგრძობენ. აქამდე ჩატარებული რვა თამაშიდან, „აია 1“-მა ყველა პრემიალური ქულით მოიგო და მეტოქეებთან ჯამში 571 ქულა აიღო.

პირველ ეტაპზე ქუთაისელებმა ყველაზე ცოტა, 51 ქულა „ჯიქთან“ დააგროვეს და ეს ანგარიში მეორე ეტაპზეც გადაყვათ, იქ კი, მონაგარს სულ უფრო და უფრო აუმჯობესებენ. როგორც წესი, მეორე ეტაპზე უძლიერესი გუნდები გადიან და „აია 1“-მა წლევანდელი სეზონის რეკორდი სწორედ აქ, მე-4 ტურში მოხსნა, როდესაც „იუნკერი ჩოხოსნებს“ 123:0 სძლია.

წარმატებულ თამაშს განაგრძობს „ლელოც“, ოღონდ ქუთაისელებივით შედეგიანი ვერაა. ამ გუნდს პირველი ეტაპიდან ერთი, უპრემიო გამარჯვება გადაყვა, მერე კი, სამივე მატჩში მოახერხა მეტოქის სამი და მეტი ლელოს სხვაობით დამარცხება. მე-4 ტურში „ლელომ“ რუსთავის „ხარებს“ 47:10 სძლია და „აიას“ მსგავსად, ჩემპიონატში დაუმარცხებელ გუნდად რჩება.

ჯერჯერობით დაუმარცხებელია „ლოკომოტივიც“, მაგრამ ამ გუნდმა ეს სერია დიდი გაჭირვებით შეინარჩუნა. „ჯიქმა“ „ახალგაზრდა რკინიგზელებს“ დიდი წინააღმდეგობა გაუწია და მინიმალური სხვაობით დამარცხდა - 21:22. „ჯიქმა“ პრემიალური ქულა აიღო.

მეორე ეტაპზე პირველი გამარჯვება იზეიმა ქუთაისის კიდევ ერთმა გუნდმა „ბაგრატმა“. ქუთაისელებმა „არმიას“ 21:3 სძლიეს, მაგრამ ლელოების საჭირო რაოდენობა ვერ მოაგროვეს და პრემიის გარეშე დარჩნენ.

10 მაისს მეხუთე ტურია, რომელშიც „ლელო“ „ლოკომოტივს“ ეთამაშება და ერთ-ერთი გუნდის წარმატებული სერია აქ შეწყდება, მერე კი, გუნდები საზაფხულო შესვენებაზე გადიან.

ზურა ქსოვრელი