ამბები

11:19 | 6.01.2016 | ნანახია 5773 - ჯერ

გერმანელებმა ქუთაისი იუარეს

საქართველოს რაგბის კავშირის ხელმძღვანელობის სურვილი, რომ საერთაშორისო თამაშები დედაქალაქს გარეთ, რეგიონებში გამართულიყო, ამ ჯერზე წარუმატებელი გამოდგა.

ზუსტად ერთ თვეში, 2016 წლის რაგბი ევროპის ჩემპიონატი, ყოფილი ერთა თასი იწყება და ქართველთა სურვილი იყო, რომ 6 თებერვალს გერმანიის ნაკრებისთვის ქუთაისში ემასპინძლათ, მაგრამ სტუმართა მხრიდან უარი მიიღეს. შედეგად, ეს თამაში თბილისში გაიმართება, თუმცა, იდეა იმისა, რომ წლის განმავლობაში ერთი თამაში მაინც ქუთაისში შედგეს, არსად გამქრალა.

ქუთასში თამაშზე უარი გერმანელებმა კი თქვეს, მაგრამ ეს მათი ახირების ბრალი სულაც არაა. აბა მათთვის მართლაც რა გადამწყვეტი მნიშვნელობა ჰქონდა, პირველ თამაშში 250 კილომეტრით იქით დამარცხდებოდნენ თუ აქეთ, უბრალოდ, თურქულმა ავიაკომპანია “პეგასუსმა”, მათ ვერ მისცა გარანტია იმისა, რომ იანვრის და თებერვლის დასაწყისში ქუთაისის აეროპორტში დაგეგმილ რეისს აუცილებლად შეასრულებდა და უარიც ამან განაპირობა.

შეგახსენებთ, რომ რაგბი ევროპის ჩემპიონატის ჯამში 8-გზის და აქედან ბოლო 5 გათამაშის ზედიზედ გამარჯვებულმა საქართველომ, შარშან გერმანელებს სტუმრად 64:8 მოუგო, თბილისში კი, ბოლოს 2010 წელს უმასპინძლეს და 77:3 გაანადგურეს. ქუთაისში “ბორჯღალოსნებმა” ბოლოს 2005 წელს ჩეხეთს უმასპინძლეს და მაშინ მეტოქე 75:10 გაანადგურეს. ამავე ქალაქში შედგა საქართველოს ეროვნული ნაკრების პირველი, ისტორიული მატჩი ზიმბაბვესთან - 1989 წლის 12 სექტემბერს, ქართველთა კრებულმა ზიმბაბვეს 16:3 აჯობა.


კომენტარები (0)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
0.113574