გლოსთერი, 18 სექტემბერი - ‘ც’ ჯგუფის პირველ მატჩამდე, რომელშიც ბორჯღალოსნები ტონგას ერკინებიან, 24 საათზე ნაკლები დრო რჩება. დღეს საქართველოს ნაკრებმა ქინგსჰოლმ სთედიუმს ტრადიციული კაპიტნის ვარჯიშის გასამართად მიაკითხა. გუნდმა 35 წუთის განმავლობაში ივარჯიშა და ხვალინდელ შეხვედრამდე მოთელა მინდორი.
შეგახსენებთ, რომ საქართველო და ტონგა ხვალ, 19 სექტემბერს, ჩვენი დროით 15 საათზე ერკინებიან. ამ მატჩს, ისევე, როგორც 2015 წლის მსოფლიო თასის ყველა შეხვედრას საქართველოს საზოგადოებრივი მაუწყებელი პირდაპირ ეთერში შემოგვთავაზებს.
ტრადიციული წინა სამატჩო პრესკონფერენცია ვარჯიშის შემდეგ გაიმართა, სადაც ჟურნალისტებს მილთონ ჰეიგი, შალვა მამუკაშვილი და მერაბ შარიქაძე ესაუბრნენ.
მილთონ ჰეიგი
- ძლიერი შერკინების გარდა რას დაუპირისპირებთ ხვალ ტონგას?
- „მნიშვნელოვანი ფაქტია ის, რომ ჩვენ მხოლოდ მორკინალებზე აღარ ვართ დამოკიდებულნი და ბურთის გათამაშება უფრო ვრცელ არეალში შეგვიძლია. ოთხი წლის მანძილზე ამის მიღწევა ადვილი არ ყოფილა, ახლა კი ვგრძნობთ, რომ მიზანს ნამდვილად მივაღწიეთ. სარაგბო უნარები, ტაქტიკა და ტექნიკა განვავითარეთ და ეს სწორედ ის არის რაც ახლა გვჭირდება. ბურთით მხოლოდ მორკინალები აღარ ირბენენ.“
- ბორჯღალოსანთა ყველაზე გამოცდილი გუნდის მნიშვნელობა ტონგას წინააღმდეგ...
- „ამ დონის ტურნირზე გამოცდილება მთავარ როლს თამაშობს. ჩვენი ოთხ წლიანი გეგმა მიზნად საშუალოდ 30-კეპიანი მოთამაშეების შეკრებას ისახავდა. ჩვენი შედეგი საბედნიეროდ დასახულ მიზანს გასცდა და დღესდღეობით სანაკრებო კეპების საშუალო რაოდენობა გუნდში 45-ია. ნაკრებში ახალგაზრდა მორაგბეებიც გვყავს, ერთ-ერთი მათგანი ჰავბექი ვასილ ვობჟანიძეა, რომელიც ხვალ მსოფლიო თასის ისტორიაში ყველაზე ახალგაზრდა მორაგბის სახელით შევა. ასაკს მნიშვნელობა არ აქვს, როდესაც რაგბს კარგად თამაშობ და ჩვენს ახალწვეულებზე მხოლოდ ამის თქმა შემიძლია.“
- რომელი ტონგელი შეუქმნის ბორჯღალოსნებს დისკომფორტს?
- „დიდია, მასიური და კვართზე 7 აწერია - ნილი ლატუ. ის ტონგელთა შეტევების და თამაშის შემკვრელი და ინიციატორია. მთლიანად ნაკრები ძალიან კარგი შემადგენლოთაა წარმოდგენილი. ფეტუჰუ ვაინიკოლო - ძალიან გამოცდილი მოთამაშე და სიალე პიატაუს. ორივე მორაგბეს ახალ ზელანდიაში ვწვრთნიდი და კარგად ვიცნობ ამ ბიჭებს, ძალიან მაგარი მორაგბეები არიან. ჩვენი მთავარი გამოწვევა ხვალინდელ თამაშზე, კარგი რაგბის ჩვენება იქნება, რადგანაც ტონგა ფავორიტია, ჩვენ კი მათთან არაერთხელ დამარცხებული გუნდი.“
- რამდენად მნიშვნელოვანია თამაშის წინ სიმშვიდის შენარჩუნება?
- „ეს სასიცოცხლოდ მნიშვნელოვანი იქნება. პირველ 10 წუთში მატჩს ვერ წააგებ, მაგრამ თუ არასწორ გადაწყვეტილებებს მიიღებ შანსებს გაუშვებ ხელიდან. სწორედ ამიტომ ასეთ მომენტებში გამოცდილება მთავარ როლს ასრულებს, დაძაბულ სიტუაციაში სწორი გადაწყვეტილების მიღებაა საჭირო. მთავარი მნიშვნელობა მოედანზე თამაშის სწორ ადგილას წარმართვას მიენიჭება.“
შალვა მამუკაშვილი
- ტონგასთან ბოლო შეხვედრის შემდეგ რა დასკვნა გამოიტანეთ?
- „გასული წლის ნოემბერში ვეთამაშეთ ტონგას. ისინი ფიზიკურად ძლიერები არიან და ბურთსაც კარგად ფლობენ. ამჯერად ჩვენი თამაში დაცვაში უნდა განვავითაროთ და შეტევაზე გადავიდეთ, რადგანაც მხოლოდ კარგი დაცვით თამაშს ვერ მოვიგებთ.“
- რას ნიშნავს თქვენთვის მსოფლიოზე თამაში?
- „ჩემთვის ეს ოცნება იყო, რომელიც ახდა, ეს ყველა მორაგბის უდიდესი ოცნებაა. ბევრი პროფესიონალი მორაგბე ვიცი, რომლებსაც მსოფლიო თასზე თამაშის შესაძებლობა არ მისცემიათ.“
მერაბ შარიქაძე
- ტონგასთან ბოლო შეხვედრის შემდეგ რა დასკვნა გამოიტანეთ?
- „თუ ჩვენ ბურთს დიდხანს შევინარჩუნებთ, ამით ტონგელებს საქმეს გავურთულებთ. თუ ჩვენ შეტევაზე გადავალთ, მათ დაცვის გაძლიერება მოუწევთ.“
- რას ნიშნავს თქვენთვის მსოფლიოზე თამაში?
- „ეს ისეთი რამ არის, რისი მიღწევაც ყველა მორაგბეს არ შეუძლია. მსოფლიოში მილიონობით მოთამაშეა, მაგრამ მხოლოდ რამდენიმე ხვდება მსოფლიო თასზე. ასეთ დროს თავს განსაკუთრებულად გრძნობ, დიდი პასუხისმგებლობაც გაკისრია და სურვილი გაქვს, რომ შენი ქვეყანა მაღალ დონეზე წარმოადგინო.“
- ტურნირზე რითი დაამახსოვრებთ თავს?
- „ბორჯღალოსნებისგან კარგ თამაშს ყველა მხოლოდ მორკინალებისგან ელოდება, მაგრამ მე, როგორც შუამარბს მსურს ყველას დავანახო, რომ ბექებსაც შეუძლიათ ისევე კარგად თამაში, როგორც ფორვარდებს. ხვალინდელ დღეს ყველა მოუთმენლად ველით და გვინდა, რომ საქართველოს გამარჯვება მოვუტანოთ, ასე, რომ ეს გუნდისთვის დიდი პასუხისმგებლობაა.“
დღიურები ინგლისიდან
გთავაზობთ ‘ინგლისური დღიურების’ მორიგ ეპიზოდს:
17/09/2015 ბრისთოლი ბორჯღალოსნების ვარჯიში ჩეთლნემში გამგზავრებმადე.
კომენტარებით: გიორგი ნემსაძე, მერაბ შარიქაძე და გუნდის ექიმი გიორგი ჭუმბურიძე
rugby.ge
კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია