საქართველოს მორაგბეთა 7-კაცა ნაკრები, ევროპის გრან პრის მეორე, ლიონის ეტაპის მეორე მატჩში საფრანგეთთან 5:38 დამარცხდა. თუ გავიხსენებთ, რომ ერთი კვირის წინ მოსკოვში ფრანგებმა 49:0 დაგვჯაბნეს, შედეგი წინაზე უკეთესია.

მთელი სათამაშო დროის განმავლობაში ტრიბუნაზე ფრანგების მხარდასაჭერად ორკესტრი უკრავდა და მარცხიც ფრანგული საბრძოლო ჰანგების ფონზე ვიწვნიეთ. პირველი ლელო მე-2 წუთზე გავიდა, როდესაც მეტოქე ფლანგზე გაიქცა და ნიკო აფციაურის ბოჭვა დაგვიანებული აღმოჩნდა - შემტევი ინერციით ლელოს მიწვდა. მერე ქართველებმა ბურთზე კონტროლი კი დაამყარეს, მაგრამ საკუთარ 22-ს თავი ვერ დააღწის და შეცდომის შემდეგ ლელო ძელებსშუა მივიღეთ. ტაიმის ბოლოს დერეფანი კი მოვიგეთ, მაგრამ ბურთს ვერ გავუფრთხილდით და ფრანგებმა საჩუქარი შეირგეს - 0:19.

მეორე ტაიმი რომ დაიწყო ბურთი დავკარგეთ და მასპინძლების სწრაფი კომბინაცია მეოთხე ლელოთი დასრულდა. ამის შემდეგ საქართველოს ნაკრების ჯერი დადგა: ზურაბ ძნელაძემ ფეხით ითამაშა და ფრანგების 22-ში შევედით, იქ მეტოქე დაჯარიმდა, ირაკლი სვანიძემ ჯარიმა სწრაფად გაითამაშა და მცველებს შორის გაძვრა - 5:26. ტაიმის ბოლოს ჩვენს 22-ში დავკარგეთ ბურთი და პირველი მიძალება კი შევაჩერეთ, მაგრამ ლელოს ვერ გადავრჩით, ხოლო თამაშის განახლების შემდეგ ფრანგებმა ბურთი წინ შეიგორეს, თავადვე აიღეს და დამატებულ წუთებზე მეექვსე ლელო გაიტანეს - 5:38 და თასის მეოთხედფინალში გასვლის შანსები მნიშვნელოვნად შემცირდა.

საქართველოს ნაკრები ჯგუფური ეტაპის დასკვნით მატჩს 18 საათზე იტალიის წინააღმდეგ გამართავს და შანსის შესანარჩუნებლად ის რაც შეიძლება დიდი სხვაობით უნდა დაამარცხოს.