საქართველოს 20-წლამდე მორაგბეთა ნაკრების კაპიტანი, პირველხაზელი ნიკა ნეფარიძე, კლუბს სამხრეთამერიკული ტურნეს შემდეგ დაუბრუნდა, სადაც ის „უმცროსი ბორჯღალოსნების“ კაპიტანი იყო. კლუბის ოფიციალურ საიტზე მისი ინტერვიუ გამოქვეყნდა.

• როდის დაიწყეთ რაგბის თამაში?
• საქართველოს ნაკრების თამაშებს რომ ვუყურებდი, რაგბით დავინტერესდი და 10 წლისა თავად მივედი რაგბიზე. ჯერ სკოლის გუნდში ვთამაშობდი, ოთხი წლის შემდეგ კი, პროფესიონალურ დონეზე ჩავერთე რაგბიში.
• „კლერმონში“ როგორ მოხვდით?
• საქართველოს 20-წლამდელთა ნაკრებთან ერთად, 2015 წელს ლისაბონში 20-წლამდელთა მსოფლიო თასის „ალაფა“ მოვიგე. სწორედ მაშინ შემომთავაზა „კლერმონის“ მწვრთნელმა მათთან გადასვლა. მე უკვე ვიცოდი ამ კლუბის შესახებ, 18-წლამდელთა ნაკრების შემადგენლობაში მათ წინააღმდეგაც მქონდა ნათამაშები და შეთავაზებას უყოყმანოდ დავთანხმდი.
• კლუბში ინტეგრაცია მარტივად მოახერხეთ?
• თავიდან გამიჭირდა, რადგან დავტოვე მშობლიური ქალაქი, ოჯახი და მეგობრები, მაგრამ ახლა ყველაფერი რიგზეა. ახლა აქაც მყავს მეგობრები. ფრანგული ენა რთულია, მაგრამ ყოველდღიურად დავდივარ მასწავლებელთან და ვსწავლობ.
• კლუბი როგორ მოგწონთ?
• აქ ევროპაში ერთ-ერთი საუკეთესო აკადემიაა, პირველი გუნდი კი, შესანიშნავია. აქ ყოფნა ჩემთვის უდიდესი შანსია და მოხარული ვარ მისი კვართის ტარების პატივი რომ მერგო.
• თქვენ ესპუართა ჩემპიონატში მონაწილეობით.
• ჩემპიონატი რთულია, რადგან მეტოქეები ძალიან კარგი გუნდები არიან და ძლიერი მოთამაშეები თამაშობენ. რა თქმა უნდა, მიზანი ჩემპიონობაა და ვფიქრობ, ამის შანსი გვაქვს.
• გასულ თვეში საქართველოს 20-წლამდე ნაკრებთან ერთად სამხრეთამერიკულ ტურნეზე იმყოფებოდით. როგორ ჩაიარა ამ ტურნემ?
• რთული შეხვედრები გვქონდა, მით უმეტეს, რომ სიცხეში გვიწევდა თამაში. ადაპტაციას გარკვეული დრო ჭირდებოდა. ვეთამაშეთ არგენტინას და ურუგვაის. მოვიგეთ ბოლო თამაში და მთლიანობაში, მსოფლიოს ჩემპიონატის წინ, კარგი მოსამზადებელი ეტაპი გავიარეთ.
• თქვენ გუნდის კაპიტანი იყავით.
• ეს იყო პირველი შემთხვევა, როდესაც გუნდს ვუკაპიტნე. ამაყი და მოხარული ვარ, რომ მწვრთნელებისგან და თანაგუნდელებისგან ასეთი ნდობა დავიმსახურე.
• საქართველოს 20-წლამდელთა ნაკრები წელს პირველად ითამაშებს მსოფლიოს ჩემპიონატზე, რომელსაც ინგლისი უმასპინძლებს.
• ძალიან რთული თამაშები გველის, რადგან მეტოქეებად უძლიერესი გუნდები გვერგო - ახალი ზელანდია, ირლანდია და უელსი. ვეცდებით, რომ მათ დიდი ბრძოლა გავუმართოთ.
• როგორია თქვენი სამომავლო ამბიციები?
• მსურს ყოველ დღე მუხლჩაუხრელად ვიმუშაო და გავაუმჯობესო თამაშის ხარისხი. მსურს საფრანგეთში დავრჩე და კარგი იქნება, თუ კარიერას „კლერმონის“ პირველ გუნდში გავარგძელებ.

მოამზადა ზურა ქსოვრელმა