რაგბი ევროპის ჩემპიონატის მე-5, ფინალურ ტურამდე ორ დღეზე ნაკლები რჩება. 19 მარტს, 17 საათზე "ბორჯღალოსნები" სეზონის ყველაზე პრინციპულ მეტოქეს - რუმინელ "მუხებს" "დინამოზე" დაუპირისპირდებიან.

მატჩის ბილეთები იყიდება დინამოს სალაროებში (11:00 – 19:00) და ონლაინ ვებ-გვერდზე BILETEBI.GE

რუმინეთთან უძლიერესი შემადგენლობით

ტრადიციულად, მატჩამდე ორი დღით ადრე "ბორჯღალოსნების" სამწვრთნელო შტაბმა ნაკრების სამატჩო რაზმი დაასახელა. ერთი კვირის წინ, რუსეთთან რკენის შემდეგ ბორჯღალოსანთა 15-ეულში ერთბაშად 6 სიახლეა

უკანა ხაზში ორი ცვლილებაა:

გარემარბად დაბრუნდა სასჯელ მოხდილი გიორგი ფრუიძე, 9 ნომრად კი - სოჭში დამარქაფებული ვასო ლობჟანიძე

შერკინება სანახევროდ გადახალისდა:

მარცხენა ბურჯად დაგვიბრუნდა მიხეილ ნარიაშვილი, რომელიც რუსეთთან მატჩისთვის გამოძახებული არ იყო და კლუბში ითამაშა, კვაჭად კი, მარქაფიდან დაწინაურდა ჯაბა ბრეგვაძე. 7 ნომრად მსოფლიო თასის შემდეგ პირველად ითამაშებს საქართველოს საუკეთესო მორაგბე მამუკა გორგოძე, ხოლო 8 ნომრად, ესოდენ მნიშვნელოვან თამაშს, პირველად დაიწყებს მზარდი ბექა გორგაძე.

ტრავმები

როგორც ადრე გაცნობეთ ესპანეთის მატჩის დროს მიღებული ბარძაყის კუნთების ტრავმის გამო გიორგი თხილაიშვილი ორ-თვიან რეაბილიტაციას გადის. მხარის ძველი ტრავმა გაუმიზეზდა დუდუ ქუბრიაშვილს. სამწუხაროდ, რუმინეთთან მატჩს გამოტოვებს მერაბ შარიქაძეც - მას კოჭ-წვივის ტრავმა ბოლომდე არ მოუშუშავს და რეაბილიტაცია სავარაუდოდ კიდევ 10 დღეს გასტანს.

მექულეთა დუელი: კვირიკაშვილი vs ვლაიკუ

რაგბი, რაღა თქმა უნდა, გუნდური თამაშია. შაბათს, "დინამოზე", ვლინდება 2016 წლის ევროპის ჩემპიონი და "ანთიმოზ ივერიელის თასის" მფლობელიც, რომელიც ამ გუნდების ჯახში 2002 წლიდან თამაშდება, მაგრამ ინტრიგას პირადული მომენტიც ამძაფრებს.

საქმე ისაა, რომ ერთმანეთს გაეჯიბრება ორი მოწინავე მექულე - ქიქერი: ქართველი მერაბ კვირიკაშვილი და რუმინელი ფლორინ ვლაიკუ.

ვლაიკუ წლეულს გამორჩეულად კარგად ირჯება: წინა შაბათს, გერმანიასთან მატჩის 59-ე წუთზე, ჯარიმა კარში დაარტყა და ანგარიში 42:0 გახადა. ერთი შეხედვით ესოდენ ულოგიკო გადაწყვეტილების მიზეზი ის იყო, რომ ოსტატმა საკარიერო მონაგარი 700 ქულას უსწორა, და თანაც ეგონა, პირველი ვარ "რაგბი ევროპაზე", ვინაც ეს მიჯნა გადალახაო.

არადა, რუმინელს დაავიწყდა ჩვენი "მეკო", ვინაც ისე, რომ პირად რეკორდს არასოდეს გამოჰკიდებია, იგივე ზღვარი იმავე დღეს სოჭში გადალახა და ვლაიკუზე ადრე - 50-ე წუთზე, როდესაც ქართველების მეორე ლელო გარდასახა და ანგარიში 17:0 გახადა. რაკი სოჭსა და იაშში თამაშები ერთდროულად დაიწყო, სწორედრომ კვირიკაშვილია პირველი ერთა თასელი, ვინაც საქართველოს და რაგბი ევროპის ისტორიაში პირველად დაძლია 700-ქულიანი ზღვარი.

"მეკო" 703 ქულით იწყებს შაბათის რკენას, ხოლო ფლორინი - ერთით ნაკლებით.

"რაგბი ევროპის" ჩემპიონატი 2016 * რუმინეთი * შაბ 19/03 თბილისი, დინამო არენა @ 17.00