საქართველოს მორაგბეთა ეროვნული ნაკრების კვაჭი ჯაბა ბრეგვაძე ხანგრძლივი იძულებითი შესვენების შემდეგ მოედანს უბრუნდება.

სარაგბო კლუბ “ყოჩების” აღზრდილმა მორაგბემ კარიერა “არმიაში” გააგრძელა, საიდანაც სამედიცინო ჯოკერის სტატუსით 2012 წელს ფრანგულ გრანდ “ტულუზის” შეუერთდა. მაგრამ მისი უცხოური კარიერა არ აეწყო. გასული სეზონის სტარტზე 27 წლის კვაჭმა მძიმე ტრავმა მიიღო, რის შემდეგაც კლუბმა მისი დატოვება აღარ ისურვა და რადგან არც სხვა ძლიერი კლუბი გამოჩნდა, მიმდინარე სეზონის პირველი ნაწილი სრულად გაუცდა. ჯაბამაც სწორი გადაწყვეტილება მიიღო, საქართველოში დაბრუნდა და მშობლიურ კლუბ “ყოჩებს” მიაშურა.

“ბორჯღალოსნებში” ბრეგვაძის დებიუტი 2008 წელს შედგა, მას შემდეგ 24-ჯერ მოირგო ნაკრების კვართი, ერთი ლელო გაიტანა და 2011 წლის მსოფლიო თასზეც ითამაშა. მის ანგარიშზე ერთი სანაკრებო ლელოა.