საქართველოს მორაგბეთა ეროვნული ნაკრების პირველხაზელმა, დავით ხინჩაგიშვილმა ახალი, 2010 წლის დაწყება, ლელოთი აღნიშნა და წლეულს პირველი ქართველი მორაგბე გახდა, რომელმაც საკუთარი ანგარიში გახსნა.
საფრანგეთის მორაგბეთა ელიტარულ დივიზიონ Top 14-ის XVII ტურში, ქართველი ლეგიონერის “ბრივი” ქვეყნის მოქმედ ჩემპიონ “პერპინიანს” მასპინძლობდა. გასული წლის ბოლო ჯახში, “ბრივი” ვიცე-ჩემპიონ “კლერმონთან” 10:52 განადგურდა, ახლა კი ხინჩაგიშვილისა და მისი თანაგუნდელების გარჯამ, ჩემპიონი იმსხვერპლა. “პერპინიანი” მე-13 წუთზე 10 წუთით კაცნაკლული დარჩა, რეფერიმ შერკინების პირველხაზელი გაასინბინა, რითაც ქართველმა ლეგიონერმა ისარგებლა და ორ წუთში ლელოთი ანგარიში გახსნა.
ხინჩაგიშვილმა მიმდინარე Top 14-ის 17 თამაშიდან 15-ში მიიღო მონაწილეობა, 9-ჯერ ძირითად შემადგენლობაში იყო. მთლიანობაში, მოედანზე 759 წუთი გაატარა. გარდა ამისა, მან “ჰეინეკენის თასის” ოთხივე თამაშში იასპარეზა (3-ჯერ ძირითადში იყო, მოედანზე 230 წუთი გაატარა), ლელოს გატანა კი ახლაღა მოახერხა. “პერპინიანმა” ჯარიმით სხვაობა მალევე შეამცირა, მაგრამ მასპინძლებმა შესვენებამდე 2 ჯარიმა გაიტანეს - 11:3. მე-2 ნახევარში “ბრივმა” კიდევ ერთი ჯარიმით იხეირა, მაგრამ მე-60 წუთამდე 2 თავადაც გაუშვა და სხვაობა ხუთ ქულამდე შემცირდა - 9:14. დასკვნითი 20 წუთი მასპინძლებმა მაღალ დონეზე ჩაატარეს, მონაგარს 2 ლელო და თითო-თითო გარდასახვა-ჯარიმა შემატეს და მნიშვნელოვანი გამარჯვება მიითვალეს. ამრიგად, “ბრივმა” მოგების ოთხთან ერთად, ერთი პრემიალური ქულაც მიიღო, 38 ქულით სატურნირო ცხრილში მე-9 ადგილი უკავია და საჩემპიონო ფლეი ოფში გასვლის შანსს ინარჩუნებს.
ხინჩაგიშვილმა და მისმა “ბრივმა”, ჩემპიონის დამარცხებით საქმე გაუკეთეს აქვსენტი გიორგაძის “კასტრსა” და დავით ზირაქაშვილის “კლერმონსაც”, რომელთა მიზანიც რეგულარული პირველობის პირველ-მეორე საფეხურზე დასრულებაა. საქმე ისაა, რომ წლეულს Top 14-ის საჩემპიონო ფლეი ოფი სხვაგვარი სისტემით ტარდება. ჩემპიონობისთვის ბრძოლას საუკეთესო 6 გუნდი აგრძელებს. საწყის ეტაპზე მესამეადგილოსანი მეექვსეს ეთამაშება, მეოთხე კი მეხუთეს, პირველ-მეორეადგილოსნები ისვენებენ და მე-2 ეტაპზე ზემოაღნიშნულ წყვილს შორის გამარჯვებულებს ხვდებიან. სწორედ ამიტომ, რეგულარული პირველობის პირველ-ორ საფეხურზე დასრულება ყველა გუნდისათვის სანუკვარი ოცნებაა.
ამ გზაზე კიდევ ერთი მნიშვნელოვანი გამარჯვება მოიპოვა ლიდერმა, აქვსენტი გიორგაძის “კასტრმა”, რომელმაც საკუთარ მოედანზე აუტსაიდერი “ალბი” 44:10 გაანადგურა და აქტივს პრემიალური ქულაც შემატა. გიორგაძე განაცხადში იყო და მოედანზე 51-ე წუთზე შევიდა, თუმცა, მანამდე მის თანაგუნდელებს საქმე უკვე მოთავებული ჰქონდათ. პირველ ტაიმში “კასტრმა” 3 ლელო გაიტანა და 22:10 მოიგო, მე-2 ნახევრის დასაწყისში მე-4 ლელოც მიითვალა, მთლიანობაში კი, მეტოქეს 6 ლელო “უძღვნა”. “კასტრი” 56 ქულით პირველ ადგილზეა და უახლოეს მდევარს, დავით ზირაქაშვილის “კლერმონს” 4 ქულით უსწრებს.
“კლერმონმა” მნიშვნელოვანი გამარჯვება მოიპოვა ფლეი ოფის საგზურისთვის მებრძოლ დავით ქუბრიაშვილის “ტულონთან”, თანაც პრემიალური ქულის აღებაც მოახერხა. მასპინძლებმა პირველ ტაიმში მხოლოდ ერთი ლელო გაიტანეს და შესვენებაზე გასვლისას 10:3-ს იგებდნენ, მე-2 ნახევარში კი კიდევ ოთხჯერ იხეირეს და მეტოქე 39:3 დაამარცხეს. ზირაქაშვილი საკუთარი გუნდის განაცხადში იყო და მოედანზე 46-ე წუთზე გამოჩნდა, ძირითად შემადგენლობაში მყოფი ქუბრიაშვილი კი, სრულად გაისარჯა. “კლერმონი” 52 ქულით მე-2 ადგილზეა, “ტულონს” კი 42 ქულა დარჩა, მე-7 საფეხურამდე დაქვეითდა, მაგრამ მე-6 პოზიციაზე მყოფ “ბიარიცს” მხოლოდ დამატებითი მაჩვენებლებით ჩამორჩება.
დიმიტრი იაშვილმა ამ ტურში მხოლოდ 2 ჯარიმა გაიტანა, მისმა “ბიარიცმა” კი, მამუკა გორგოძისა და გიორგი ჩხაიძის “მონპელიე” 26:10 დაამარცხა. ჩხაიძე ძირითად შემადგენლობაში იყო და სრულად ითამაშა, გორგოძე კი მოედანზე მე-60 წუთზე შევიდა. მასპინძლებმა თამაში 50 წუთში დაასრულეს - 4 ლელო და 2 ჯარიმა გაიტანეს, თავად ერთი ჯარიმა გაუშვეს და 26:3 დაწინაურდნენ. “მონპელიემ” კინკილა ლელო და გარდასახვა მიწურულს გაიტანა და საბოლოო შედეგი დააფიქსირა. იაშვილი მწვრთნელმა 66-ე წუთზე შეცვალა, მისი “ბიარიცი” 42 ქულით მე-6 ადგილზეა და “ტულონს” დამატებითი მაჩვენებლებით უსწრებს, ხოლო “მონპელიე” 33 ქულით მე-10 პოზიციაზეა.
“სტად ფრანსესთან” ფრედ, 6:6 ითამაშა გოდერძი შველიძისა და ბექა შეყლაშვილის “მონტობანმა”. შეყლაშვილი განაცხადში არ იყო, შველიძე კი მოედანზე 55-ე წუთზე გამოჩნდა. ქართველი ლეგიონერების გუნდმა ჯარიმა და არეკნი გაიტანა, სტუმრებმა კი ორჯერვე ჯარიმით იხეირეს. “მონტობანს” 32 ქულა აქვს და სატურნირო ცხრილში მე-11 ადგილზეა. ტურის კიდევ ერთ შეხვედრაში ’ტულუზამ” ”ბაიონი” სტუმრად 15:13 დაამარცხა. XVIII ტურის შეხვედრები 8-10 იანვარს გაიმართება.

ზურა ქსოვრელი