ინგლისის რაგბის კლუბ “სარაცინის” ხელმძღვანელთა განცხადებით,  გულშემატკივრები, რომლებიც მიმდინარე სეზონის დარჩენილი საშინაო შეხვედრების აბონემენტებს შეიძენენ, გადახდილ თანხას სრულად მიიღებენ უკან, იმ შემთხვევში,  თუ გუნდი დარჩენილი ექვსი მატჩიდან ერთ-ერთში მაინც დამარცხდება.
“გინესის პრემიერშიპში” ამ გუნდის დარჩენილი ოთხი საშინაო შეხვედრიდან, ორი “უემბლის” სტადიონზე ჩატარდება. გარდა ამისა, ნაციონალური პირველობის ერთ-ერთ ლიდერს სხვა ტურნირებში მინიმუმ ორი საშინაო მატჩი ელის - “ჩელენჯ ქაფზე” და ინგლის-უელსის თასზე (LV Cup-ი, რომელსაც ადრე EDF Energy Cup-ი ეწოდებოდა).  “სარაცინი” “ჩელენჯ ქაფზე” ფრანგულ “ტულონს”, LV Cup-ზე - “ნიუპორტს”, ხოლო “გინეის პრემიერლიგაში” - “უორჩესტერს”, “ბატს”, “ნიუკასლს” და “ჰალიკვინსს” მასპინძლობს. “ჩელენჯ ქაფზე” “სარაცინი” ამჟამად 13 ქულით მეორე ადგილზეა და “ტულონს” 5 ქულით ჩამორჩება, ეროვნულ ჩემპიონატში 40 ქულით მეორეა და პირველ ადგილოსან “ლესტერსთან” ერთ ქულას აგებს, ოღონდ მეტოქეზე ერთი მატჩით ნაკლები აქვს გამართული.