საქართველოს 18-წლამდე მორაგბეთა ნაკრებმა, იტალიის ქალაქ ტრევიზოს მახლობელ იასოლოში მიმდინარე ევროპის ასაკობრივი ჩემპიონატის 1/4-ფინალურ შეხვედრაში, რუმინელი თანატოლები 25:7 დაამარცხა და ნახევარფინალში თამაშის უფლება მოიპოვა, სადაც მეტოქე ირლანდიის ნაკრებია.
შეხვედრა ქართველთათვის არცთუ წარმატებულად დაიწყო. უკვე მე-3 წუთზე “მუხის ფოთლებმა” მეტოქეს, ფეხით გადაკიდებისას, ბურთზე დაუფარეს და ლელო გაიტანეს, ზუსტი გარდასახვის შემდეგ კი 7:0 დაწინაურდნენ. “პატარა ბორჯღალოსნები” სწრაფად მოეგნენ გონს, მეტოქის ნახევარზე დამკვიდრდნენ და პირველ ტაიმში 2 საპასუხო ლელო დადეს, მაგრამ ორივე რეალიზაცია არაზუსტი გამოდგა და ტაიმი მხოლოდ 3 ქულის სხვაობით მოიგეს - 10:7. პირველ ნახევარში ლელოები “აია”-ს აღზრდილებმა, შერკინების მოთამაშე ბექა მამრიკიშვილმა და უკანახაზელმა ზურაბ ძნელაძემ გაიტანეს. ქართველებმა აღებული ტემპი არც მე-2 ტაიმში დააგდეს, საკუთარი ჩათვლის მოედანი მშრალად შეინახეს, მეტოქეს კი, კიდევ 2 ლელო უძღვნეს. ერთხელ თავი კვლავ ქუთაისური კლუბის აღზრდილმა ბექა არაბიძემ გამოიჩინა, ბოლოს კი, რუმინელთა ჩათვლის მოედანი “აკადემიელმა” ლაშა ლომიძემ აიკლო. 4 დარტყმული რეალიზაციიდან მხოლოდ ერთი გამოიყენა ბახვა კობახიძემ, მანამდე კი, მანვე კარგი შეტევა არეკნითაც დააგვირგვინა.
მიუხედავად იმისა, რომ ირლანდიამ გერმანიას მხოლოდ 20:11 აჯობა, თვითმხილველთა თქმით, ირლანდიელებს სრული უპირატესობა ჰქონიათ და ნახევარფინალში საქართველოს ნაკრებს ძლიერი მეტოქე ეყოლება, მაგრამ ლევან მგელაძე და მისი შეგირდები არაფრის დათმობას აპირებენ.
ნამატჩევს “მსოფლიო სპორტი” მგელაძეს იტალიაში დაუკავშირდა და ჯერ რუმინელებთან გამართულ შეხვედრაზე დაეკითხა.
ლევან მგელაძე: თამაში დაძაბული გამოდგა, რადგანაც თავიდან ვერ ავეწყეთ და ამასთან, მე-3 წუთზე, პრაქტიკულად არაფრისგან ლელო მივიღეთ. დიდი მობილიზაცია დაგვჭირდა, რათა თამაშში გარდატეხა შეგვეტანა. რუმინეთისა და საქართველოს ამ ნაკრებებს ერთმანეთთან ბუქარესტში ჰქონდათ ნათამაშები და ის შეხვედრა ჩხუბის გამო ჩაიშალა. დაწინაურებულ რუმინეთს ტაქტიკის შეცვლის შესაძლებლობა მიეცა, პროვოკაციებსაც არ ერიდებოდა, მაგრამ მორაგბეებმა ბოლომდე შეასრულეს დავალებები, მეტოქის ქმედებებს არ აჰყვნენ და 4 საპასუხო ლელო გაიტანეს. ანგარიში უფრო დიდი იქნებოდა, მაგრამ 3 გარდასახვა ვერ გამოვიყენეთ და რამდენიმე ჯარიმაც გაგვიცუდდა. მხოლოდ ბოლო გარდასახვის გატანა მოვახერხეთ, რომელიც ბახვა კობახიძემ ძელებს შუა გააძვრინა, მანამდე კი, მანვე კარგი შეტევა არეკნით დააგვირგვინა.
- რით ვაჯობეთ რუმინელებს და რაში მოვიკოჭლებდით?
- მეტოქეს თითქმის ყველა კომპონენტში ვაჯობეთ. აქცენტი გაშლილ თამაშზე გვქონდა აღებული, რუმინელთა ხაზს ხშირად ვჭრიდით და 3 ლელო ასე გავიტანეთ. მოწინააღმდეგეს არც ძალისმიერ თამაშში დავუთმეთ რამე და ერთი ლელო, აუტის შემდეგ, მოლის აგორებით გავიტანეთ. საწყისი 20 წუთის შემდეგ ძალიან დიდ უპირატესობას ვფლობდით, ოღონდ ეგ იყო, აუტებში ვერ გავისარჯეთ მთლად კარგად. ახლა ირლანდიასთან მატჩისთვის ვემზადებით.
- მომავალი მეტოქის თამაში თუ ნახეთ?
- სწორედ ახლა მოვდივარ ირლანდიისა და გერმანიის ნაკრებების შეხვედრიდან. ირლანდიელებს ძალიან ძლიერი გუნდი ჰყავთ.
- მაგრამ 20:11 დიდი სხვაობა სულაც არაა...
- ანგარიშმა არ მოგატყუოთ. ირლანდიელები პრაქტიკულად ყველაფერს აკეთებდნენ, რაც სურდათ. მათი ყველა რგოლი ძალზე ძლიერია და აუტებშიც შესანიშნავად თამაშობენ, ჩვენ კი სწორედ ამ კომპონენტში გვიჭირს.
- იქნებ თამაში წინასწარ წაგებული მაინც არაა, ჩვენი ეროვნული გუნდი ხომ ირლანდიისას 2007 წლის მსოფლიო თასზე მაგრად ეთამაშა...
- მე ვთქვი, რომ ირლანდიას ძლიერი გუნდი ჰყავს, თორემ არ ვარ ის მწვრთნელი, რომელიც წინდაწინ აგებს შეხვედრებს. ასე რომ, წინ დიდი ბრძოლა გველის.
დანარჩენ მეოთხედფინალებში საფრანგეთის ნაკრებმა მასპინძელი იტალია 50:10 გაანადგურა, ბელგიის ნაკრებმა კი რუსეთს 27:14 აჯობა. თასისთვის ბრძოლას, საქართველოსა და ირლანდიის ნაკრებებთან ერთად, ბელგიელები და ფრანგები განაგრძობენ; იტალია, რუმინეთი, რუსეთი და გერმანია კი ეცდებიან, რომ ბოლო ადგილს თავი დააღწიონ და მომავალ ევროპის ჩემპიონატისთვის A დივიზიონში ადგილი შეინარჩუნონ.

ევროპის ჩემპიონატი 18-წლამდე მორაგბეთა შორის
28 მარტი. 1/4-ფინალი
საფრანგეთი - იტალია 50:10
ირლანდია - გერმანია 20:11
რუმინეთი - საქართველო 7:25
ბელგია - რუსეთი 27:14
 

31 მარტი
ნახევარფინალები
V ადგილისთვის
გერმანია - რუმინეთი
იტალია - რუსეთი
 

თასის ნახევარფინალები
ირლანდია - საქართველო
საფრანგეთი - ბელგია
 

3 აპრილი. ფინალები

ზურა ქსოვრელი