საქართველოს მორაგბეთა XXII ჩემპიონატი, თავისი წინამორბედის მსგავსად, ყოველგვარი ოფიციალური ატრიბუტიკის გარეშე გაიხსნა. “მიხეილ მესხის” სათადარიგო მოედანზე არ გაჟღერებულა საქართველოს ჰიმნი და არც კაპიტნებს აღუმართავთ ეროვნული დროშა.
სამაგიეროდ, თამაშს მოწყურებულმა მორაგბეებმა მოედანზე ცეცხლი დაანთეს და შესაბამისად, თბილისის “ვისოლი-ყოჩებისა” და ქუთაისის “აია”-ს შეხვედრა ერთობ კარგი საყურებელი გამოდგა. სწრაფი ტემპისა და თავდაუზოგავი ბრძოლის შემხედვარე მუშებმა, რომლებიც სტადიონის მახლობლად მუშაობდნენ, საქმეს თავი ანებეს და მოედანზე გამართულ ორთაბრძოლას თვალი ზემოდან ადევნეს.
თბილისელებმა, რომლებიც მასპინძლები იყვნენ და ფავორიტებადაც მიიჩნეოდნენ, უპირატესობა მოიპოვეს, მაგრამ მისი რეალიზაცია სათანადოდ ვერ მოახერხეს. ისინი მე-7 წუთზე ჯარიმით დაწინაურდნენ, თუმცა, ქუთაისელთა ნახევარზე გატარებული დრო ვეღარ გამოიყენეს და მონაგარს ქულა ვერ შემატეს, ტაიმის ბოლოს კი, სინაურიძემ ჯარიმითვე წონასწორობა აღადგინა. მე-2 ნახევრის დასაწყისში “ვისოლი-ყოჩების” მიძალებას ბრეგვაძის ლელო მოჰყვა და თითქოს მასპინძლებს მომხვდურის წინააღმდეგობა უნდა გაეტეხა, მაგრამ...
“აია”-მ ჯარიმით სხვაობა შეამცირა, მერე კი საპასუხო ლელო გაიტანა, რეალიზაციაც გამოიყენა და 13:8 დაწინაურდა. ჭკვიანური თამაშით და გამოყენებული შანსებით, მათ მე-60 წუთისთვის სხვაობა 11 ქულამდე გაზარდეს და მასპინძლები ურთულეს მდგომარეობაში ჩააგდეს. თბილისელებმა გაიბრძოლეს და ნიჟარაძემ ცენტრში ულამაზესი ლელო გაიტანა, სოხაძემ რეალიზაცია გამოიყენა და ანგარიში 14:19 გახდა. “ვისოლი-ყოჩებს” დარჩენილ ხუთ წუთში ლელოს გატანა მართებდა, მაგრამ სტუმრებმა ბოლო ძალები მოიკრიბეს, შეტევებს გაუძლეს, მერე თავად კიდევ ერთი ჯარიმა გამოიყენეს და 22:15 იმარჯვეს.
დაძაბული გამოდგა პარალელური შეხვედრაც. პირველ ტაიმში “ლოკომოტივმა” 2, ხოლო “აკადემიამ” ერთი ჯარიმა გაიტანა. მე-2 ნახევარში მასპინძლებმა კვლავ 2 ჯარიმა გამოიყენეს, სტუმრებმა ლელო და გარდასახვა მიითვალეს, მაგრამ ეს საკმარისი არ აღმოჩნდა და “ლოკომოტივმა” 2 ქულა ჩაიწერა. მიმდინარე სეზონი კარგად დაიწყო შარშანდელმა ვერცხლის პრიზიორმა - ბათუმში მასპინძლებმა რუსთაველებს 9 ქულის სხვაობით მოუგეს, თუმცა, ურიგოდ არც “ხარებს” უთამაშია.
“მიხეილ მესხის” სათადარიგო მოედანზე გამართულ მეორე შეხვედრაში, უმაღლეს ლიგაში დაბრუნებულმა “არმაზმა” ჩემპიონ “ლელოს” უმასპინძლა და 6:0 დაწინაურდა, მაგრამ მერე სტუმრებმა იმძლავრეს, შესვენებამდე 3 ლელო გაიტანეს, მონაგარს თითო-თითო გარდასახვა და ჯარიმა შემატეს, თავად მხოლოდ ერთი ჯარიმა მიიღეს და ტაიმი 20:9 მოიგეს. მე-2 ნახევრის საწყისმა 25-მა წუთმა უქულოდ განვლო, მერე კი “ლელომ” კვლავ ლელო მიითვალა, რაზეც “არმაზმა” ჯარიმით უპასუხა, თუმცა, საბოლოო სიტყვა მაინც ჩემპიონმა თქვა - ნომინალური მასპინძლების ჩათვლის მოედანში ერთხელაც შეაღწია და ზუსტი გარდასახვის შემდეგ, საბოლოო შედეგი დააფიქსირა - 34:12.

თბილისი. “მიხეილ მესხი” 500 მაყურებელი
ვისოლი-ყოჩები (თბილისი) - აია (ქუთაისი) 15:22 (3:3)
ვისოლი-ყოჩები: ასეიშვილი (ბარბაქაძე 69), ბრეგვაძე, ხოსიტაშვილი (გოგიშვილი 50), ბელაშვილი, არჩუაშვილი (მეტრეველი 69), ცხვედიანი, კალმახელიძე, დგებუაძე (მამულაშვილი 60); მახარაშვილი, სოხაძე, ნიჟარაძე, ადანაია, ქუშაშვილი (მაისურაძე 50), გეგენავა, დადაშიანი (კვარაცხელია 78).
მწვრთნელი: ლევან მგელაძე
2 ლელო: ბრეგვაძე, ნიჟარაძე
გარდასახვა: სოხაძე
ჯარიმა: სოხაძე
აია: ლომიძე (ჟვანია 62), ნარიაშვილი, ხეჩიკოვი (გურეშიძე 32), იობიძე, შალამბერიძე, რევიშვილი, ჩიღვინიძე, ძაგნიძე (ცირეკიძე 59); როხვაძე, შარვაშიძე, გოშაძე, სინაურიძე, აშვეთია (გოგლიჩიძე 8), ჩხიკვაძე, ხამაშურიძე.
მწვრთნელი: კობა გიორგაძე
ლელო: შარვაშიძე
გარდასახვა: სინაურიძე
5 ჯარიმა: სინაურიძე
რეფერი: გ. ამირხანაშვილი


თბილისი. “მიხეილ მესხი”. 300 მაყურებელი
არმაზი (თბილისი) - ლელო (თბილისი) 12:34 (9:20)
არმაზი: ბუკია, სოსელია, ქართველიშვილი, ჯიშკარიანი, ჭელიძე (მინაშვილი 77), ჟღენტი (კანდელაკი 61), მინაშვილი, თიგიშვილი; მჟავანაძე, კიკნაძე, ბერძელი, გაბროშვილი, კაიფაჯიანი, ტუჩაშვილი, კოტორაშვილი.
4 ჯარიმა: კიკნაძე
ლელო: სანიკიძე (მირცხულავა 41), ჭყონია (კვერნაძე 78), ცხოვრებაშვილი (გაბელია 58), ხორბალაძე, დაუშვილი (მძინარიშვილი 47), სარდანაშვილი (ჭყოიძე 61), ვ. კოლელიშვილი (ბ. კოლელიშვილი 77), აზლაძე; კაჭარავა, ლომინაძე, თოდუა, მანჯავიძე, კორკელია, გუგავა (ჯოგლიძე 58), ყიასაშვილი.
მწვრთნელი: ლევან მაისაშვილი
5 ლელო: გუგავა, აზალაძე, სარდანაშვილი, კორკელია, ლომინაძე
3 გარდასახვა: ყიასაშვილი
ჯარიმა: ყიასაშვილი

თბილისი. ვარკეთილის მეურნეობა
ლოკომოტივი (თბილისი) - აკადემია (თბილისი) 12:10 (6:3)

ბათუმი. ანგისა
ბათუმი XV (ბათუმი) - ხარები (რუსთავი) 26:17 (19:12)

ზურა ქსოვრელი