საქართველოს ჩემპიონატის ვერცხლის პრიზიორმა “ბათუმი XV”-მა, რომელიც ქართული კლუბების მორაგბეებითაა გაძლიერებული, რუმინული “არადი” 30:17 დასცა და მას ფინალში გასვლის საშუალება არ მისცა. პირველ სექტემბერს, ბათუმური კლუბის სახელით მობურთალი გუნდი “ლოკომოტივს” დაუპირისპირდება და “შავი ზღვის თასის” პირველი გათამაშების ერთ-ერთი ქართველი ფინალისტის ვინაობაც, მათი ჯახის შედეგად გაირკვევა.
“ბათუმი”-“არადის” მატჩში, ჯარიმით ანგარიში სტუმრებმა გახსნეს, მაგრამ 25-ე წუთისათვის, ხამაშურიძის და შკინინის ლელოების შემდეგ, რომლებიც კიკნაძემ ზუსტად გარდასახა, “ბათუმი XV” 14:3 დაწინაურდა. ტაიმის მიწურულს, ბათუმელებს კიკნაძე გაუსინბინეს და რუმინელებმაც ლელო-გარდასახვით სხვაობა შეამცირეს, თუმცა, ტაიმი მასპინძლებმა 20:10 მოიგეს, რადგანაც შესვენებამდე აშვეთიამ ჯარიმა გამოიყენა. მე-2 ნახევრის შუაწელს ლელო არჩუაშვილმა მიითვალა და მას ზუსტი გარდასახვა მოჰყვა. ბოლოსკენ, ლელო-გარდასახვა რუმინელებმაც მიითვალეს, მაგრამ შეხვედრის ბოლოს ქულები ისევ ქართველებმა აიღეს - კიკნაძემ ჯარიმა ზუსტად შეასრულა და “ბათუმი XV”-მა 30:17 იმარჯვა.
ამრიგად, A ჯგუფის გამარჯვებულის ბედს “ბათუმი XV”ისა და “ლოკომოტივის” დაპირისპირება გადაწყვეტს და ფინალში ერთი ქართული გუნდი უთუოდ იქნება. დღის მეორე შეხვედრაში, B ჯგუფის მატჩში, ოდესის “კრედო 63”-მა და რუმინულმა “ბუქარესტმა”, ერთურთს სამ-სამი ლელო გაუტანეს, მაგრამ უკრაინელებმა უკეთ ურტყეს, თამაში 28:23 მოიგეს და ჯგუფურ ეტაპზე მე-2 ადგილზე გასვლის შანსი გაიზარდეს. ამ ჯგუფის გამარჯვებულის ვინაობა პირველ სექტემბერს, თბილისის “ლელოსა” და “ბუქარესტის” დაპირისპირების შემდეგ გაირკვევა.