რაგბის საერთაშორისო საბჭომ (IRB) იმ მატჩების განრიგი გამოაქვეყნა, რომლებიც სტარტს ოქტომბრის მიწურულს აიღებს და დეკემბრის დასაწყისში დასრულდება. მომავალ კალენდარში თამაშების უმრავლესობა ტესტ-მატჩების სტატუსს ატარებს, ოფიციალური კი მხოლოდ რუმინეთისა და ურუგვაის ნაკრებთა დაპირისპირება იქნება. ეს გუნდები ერთმანეთს მსოფლიოს 2011 წლის თასის ბოლო საგზურს ეცილებიან და მონტევიდეოსა და ბუქარესტში სამკვდრო-სასიცოცხლო შერკინებას გამართავენ.
ნოემბერი დატვირთული იქნება საქართველოს ეროვნული ნაკრებისთვისაც, რომელიც ერთკვირიან მონაკვეთში თბილისში “ეროვნულ სტადიონზე” ჯერ – კანადას, შემდეგ კი აშშ-ს ეროვნულ გუნდს დაუპირისპირდებიან. შეგახსენებთ, რომ IRB-ს ამჟამინდელ რეიტინგში ორივე ხსენებული ნაკრები “ბორჯღალოსანთა” წინ იმყოფება, მათი დამარცხების შემთხვევაში კი, ქართველ მორაგბეებს კლასიფიკაციაში წინსვლა გარანტირებული ექნებათ.
საერთოდაც, მომავალი ტესტები IRB-ს რეიტინგში საგრძნობ ცვლილებებს რომ შეიტანს, აქედანვე ცხადია, გარდა ამისა კი, მწვრთნელებს მომავალი მსოფლიოს თასისთვის გუნდის უკეთ შეთამაშების საშუალება მიეცემათ.
“ნოემბრის ტესტებს მომავალი ბატალიებისთვის მზადების პროგრამაში უდიდესი როლი აკისრიათ. ის გუნდები, რომლებიც მსოფლიოს თასის ფინალურ ეტაპზე უკვე გასულები არიან, მზადების გადამწყვეტ ფაზაში სწორედ ახლა გადადიან. რაგბის საერთაშორისო საბჭო ყველაფერს აკეთებს, რათა სათამაშო პრაქტიკა ე.წ. “მეორე რანგის” ქვეყნებსაც არ მოაკლდეთ. ამ მხრივ განსაკუთრებულ მადლობას საფრანგეთის რაგბის კავშირსა და ფრანგ “ბარბაროსებს” ვუხდით, რომლებმაც 26 ნოემბერს ტონგასთან თამაშზე თანხმობა განაცხადეს”, - აღნიშნა IRB-ს განვითარებისა და ანალიზის განყოფილების თავმჯდომარე მარკ იგანმა.