„ოლ ბლექსის“ ყოფილი მორაგბე, ახალზელანდიელი დენ კარტერი, რომელიც ამჟამად ტოპ 14-ის „რასინგის“ ღირსებას იცავს, ექვსი ერის ხელმძღვანელობას ბონუს-ქულების დარიცხვის სისტემის დანერგვას ურჩევს.

მსოფლიოს ჩემპიონი და პლანეტის საუკეთესო მექულე მიიჩნევს, რომ ეს ტურნირს უფრო სანახაობრივს გახდის:

„დარწმუნებული ვარ, რომ ბონუს-ქულების სისტემის დანერგვა ტურნირის სანახაობრივ მხარეს მნიშვნელოვნად აამაღლებს. სუპერ რაგბიში ყოველთვის ოთხი ლელოს გატანაზე ორიენტირებული ვთამაშობდით, რათა პრემიალური ქულა აგვეღო. ეს სისტემა გაიძულებს, რომ მხოლოდ გამარჯვებაზე არ იყო ორიენტირებული და ვფიქრობ, ექვს ერს მსგავსი მიდგომა ძალიან მოუხდებოდა“.

გარდა ამისა, კარტერის აზრით, ტურნირი და ზარალდება ნაკრებებისთვის მოსამზადებელი ეტაპის სიმცირის გამო.

„როდესაც ექვსი ერის კალენდარი ასე მჭიდროა და თითოეული შეხვედრის შედეგს უდიდესი მნიშვნელობა აქვს, თამაშები ვერ იქნება მიმზიდველი, მით უმეტეს, რომ გუნდებს მოსამზადებლად და ერთად სავარჯიშოდ ძალიან მცირე დრო აქვთ. ტურნირის მსვლელობისას გაუმჯობესება ყველას ეტყობა, მაგრამ გუნდის შეთამაშება ასეთ მოკლე დროში მაინც ძნელია, მით უმეტეს, როდესაც სასწორზე ასე ბევრი დევს“ - ამბობს კარტერი.

ზურა ქსოვრელი