რუსეთის სარაგბო ნაკრების ერთ-ერთი ლიდერი ვასილი არტემიევი, ქართველებთან მოახლოებულ მატჩს თანაგუნდელთაგან განსხვავებულად უდგება და მას პრინციპულ მნიშვნელობას არ ანიჭებს. აღნიშნულის შესახებ, არტემიევმა “სპორტ-ექსპრესთან” ინტერვიუში განაცხადა.
“პირადად ჩემთვის, ეს მატჩი პრინციპულ ხასიათს არ ატარებს. ცხადია, გვინდა ხანგრძლივი წარუმატებელი სერია შევწყვიტოთ და გავიმარჯვოთ, თუმცა, ობიექტურები უნდა ვიყოთ – ჯერჯერობით, ისინი ძლიერები არიან. სტატიკურ მდგომარეობაში ქართველთა შერკინება, საერთოდაც, მსოფლიოში ერთ-ერთი საუკეთესოა. თუმცა, მათ წინაშე არანაირი კომპლექსი არ გვაქვს”.
შეგახსენებთ, რომ 23 წლის არტემიევი, რომელიც კარგა ხანს “ვვა-პოდმოსკოვიეს” ღირსებას იცავდა, მცირე ხნის წინ, ბრიტანეთში გადაბარგებული პირველი რუსი მორაგბე გახდა. მან კონტრაქტი ინგლისის პრემიერლიგის წევრ “ნორთჰემპტონთან” გააფორმა.