საქართველოს მორაგბეთა ეროვნული ნაკრების მთავარი მწვრთნელის ვინაობა ხვალ გახდება ცნობილი.
საქართველოს რაგბის კავშირის ხელმძღვანელობა “შევარდენის” სანაკრებო ბაზაზე ამ ფაქტთან დაკავშირებით პრესკონფერენციას 13:00 საათზე გამართავს.
“ბორჯღალოსნების” მთავარი მწვრთნელი რიჩი დიქსონი თავის ასისტენტებიანად გუნდს ახალ ზელანდიაში დასრულებული მსოფლიო თასის შემდეგ დაემშვიდობა. შოტლანდიელი ქართულ რაგბიში რჩება, ოღონდ სხვა სტატუსით.
ოქტომბრიდან მოყოლებული, სრკ-ის ხელმძღვანელობა ნაკრების თავკაცის კანდიდატების განხილვით იყო დაკავებული. ბოლო მომენტისთვის კანდიდატი სამი იყო - ინგლისელი, ფრანგი და ახალზელანდიელი. გვარები არ კონკრეტდებოდა და ხვალამდე არც “ბორჯღალოსანთა” მომავალი მწვრთნელის ვინაობაა ცნობილი, მაგრამ უკვე შეგვიძლია იმის თქმა, რომ არჩევანი ზელანდიელზე შეჩერდა.
 

ზურა ქსოვრელი